Zv. ministri i Administratës Publike dhe Pushteti Lokal, në një intervistë për Tv Arbëria, duke i komentuar zhvillimet politike në veri në një vjetorin sulmit paramilitar të grupeve të armatosura nga Serbia, ka pohuar se ndryshimet në këtë hark kohor janë të jashtëzakonshme në këtë pjesë të vendit. Ai e ka lavdëruar guximin e Policisë së Kosovës në mbrojtje të integritetit territorial të shteti, ku edhe kishte rënë dëshmor, rreshteri policor, Afrim Bunjaku.
Sipas tij, disa aksione protestuese të kohëpaskohshme nga qytetarë serbë në atë pjesë, janë manifestim i tyre, por edhe të inkurajuar nga prania e bashkësisë ndërkombëtare. Mirëpo, në dallim nga këto grupe të vogla shumica e qytetarëve të zakonshëm i kërkojnë dy gjëra; një që pushteti në Kosovë nuk do “t’i lë në lloq”, pra që ata nuk do të kthehen përsëri nën tutelën e Listës Serbe, apo çfarë do formacioni tjetër të mbështetur nga Beogradi dhe e dyta siguri financiare, vende pune, investime etj.
Zyrtari qeveritar ne fjalë, ndër të tjera, ka pohuar se gabimisht fokusi i mediave, diplomatëve ndërkombëtarë si dhe i opozitës, kanë qenë më shumë të orientuar tek ata serbë që janë më të zëshëm, por jo te qytetarët e zakonshëm, duke krijuar përshtypje se kjo Qeveri po i shtyp të drejtat e serbëve.
Për më shumë, zv. ministri Vokrri ka hedhur akuza ndaj zyrave diplomatike në Kosovë se të njëjtit kanë shkuar deri atje se kanë mbështetur financiarisht shoqata dhe individë të komunitetit serb, të cilët jo vetëm që e pengojnë integrimin e këtij komuniteti, por kanë bërë thirrje për rebelim të tij ndaj shtetit të Kosovës. Si shembull të kësaj dukuri ai ka përmendur, organizatën “New Social Initiative” ku drejtuesit e saj, pas rastit të Banjskës kanë bërë thirrje të hapur për dhunë. Dhe të njëjtën organizatë e mbështet një pjesë e madhe e pranisë ndërkombëtare, ambasadat që funksionojnë në Prishtinë, etj
Zv. ministri Vokrri ka konstatuar se ndër efektet kryesore të aksioneve policore në veri, ka qenë edhe çlirimi i vullnetit politik të serbëve të Kosovës. Ai ka pohuar se Lista Serbe nuk do t’i fitojë zgjedhjet, në mesin e këtij komunitet kur do që mbahen ato dhe se në ngitje është një alternative tjetër politike. Dhe se më në fund po krijohet një ambient pluralist politik edhe te komuniteti serb. /TV Arbëria
