Një gjerman i dënuar me vdekje në Bjellorusi është falur nga presidenti i vendit, vetëm pak ditë pasi lajmi për rastin u bë publik. Rico Krieger, 30 vjeç, u shpall fajtor për akuzat për terrorizëm në një seancë që u mbajt me dyer të mbyllura dhe u bë publik vetëm javën e kaluar.
Krieger, i cili më parë ka punuar për Kryqin e Kuq Gjerman, u akuzua për vendosjen e eksplozivëve në një hekurudhë në vend me urdhër të inteligjencës ukrainase.
Askush nuk u lëndua nga shpërthimi që supozohet se pasoi. Në fillim të kësaj jave, Krieger u shfaq, i prangosur, në një intervistë televizive të organizuar të transmetuar në median shtetërore bjelloruse. Duke qarë, ai iu lut autoriteteve gjermane që të ndërhynin në rastin e tij.
“Zoti Scholz, ju lutem, unë jam ende gjallë… nuk është ende vonë”, tha Krieger, i cili u fotografua i prangosur brenda një qelie, duke i bërë thirrje kancelarit gjerman, Olaf Scholz, shkruan The Guardian.
Nuk kishte asnjë provë që Krieger ishte fajtor. KGB-ja, siç njihen ende shërbimet sekrete bjelloruse, është akuzuar gjerësisht për tortura dhe fabrikim të provave. Bjellorusia është i vetmi vend europian që vazhdon ta ketë dënimin me vdekje.
Të martën, media shtetërore bjelloruse raportoi se presidenti Alexander Lukashenko, lideri autokratik i vendit, e kishte shqyrtuar rastin dhe e kishte falur Krieger. Më herët, Lukashenko kishte takuar prokurorin dhe avokatët mbrojtës, gjoja për të kuptuar plotësisht detajet.
Ende nuk dihet qartë nëse dhe kur Krieger do të lirohet nga burgu. Rasti u pa gjerësisht si një përpjekje e autoriteteve bjelloruse për të ushtruar presion mbi Berlinin dhe diplomatët gjermanë dihej se ishin në diskutime me Minskun mbi rastin.
Është e mundur që Krieger mund të jetë pjesë e një marrëveshjeje më të gjerë të shkëmbimit të të burgosurve midis Rusisë dhe perëndimit. Lukashenko është një aleat i vendosur i Vladimir Putinit dhe Moska ka qenë prej kohësh e prirur për të nxjerrë vrasësin Vadim Krasikov nga një burg gjerman. Krasikov u dënua për vrasjen e një mërgimtari çeçen në një park të Berlinit në vitin 2019.
Të premten, zëdhënësja e qeverisë gjermane, Christiane Hoffmann tha se Scholz ishte në dijeni të rastit dhe “i shqetësuar për këto ngjarje”.