Departamenti i Zjarrfikësve në Kampin Bondsteel, në mbështetje të misionit të Komandës Rajonale të KFOR-it të udhëhequr nga NATO, ka shënuar Javën e Parandalimit të Zjarrit me një sërë aktivitetesh edukative dhe praktike.
Gjatë javës, zjarrfikësit zhvilluan demonstrime për përdorimin e duhur të fikësve të zjarrit, trajnime mbi masat parandaluese dhe seanca interaktive për rritjen e njohurive të personelit mbi procedurat e sigurisë nga zjarri.
Këto aktivitete synuan të rrisin ndërgjegjësimin dhe përgatitjen për menaxhimin e situatave emergjente, duke reflektuar angazhimin e departamentit për mbrojtjen dhe edukimin e anëtarëve të shërbimit dhe personelit në bazë.
“Aktivitete të tilla kontribuojnë në sigurinë dhe gatishmërinë e përgjithshme të misionit,” thuhet në njoftimin e KFOR-it.
KFOR-i, sipas mandatit të tij të përcaktuar nga Rezoluta 1244 e Këshillit të Sigurimit të OKB-së (1999), vazhdon të punojë për një mjedis të sigurt dhe të qëndrueshëm për të gjithë qytetarët dhe komunitetet në Kosovë, si dhe për garantimin e lirisë së lëvizjes.
Misioni i udhëhequr nga NATO bashkëpunon ngushtë me Policinë e Kosovës dhe Misionin e Bashkimit Evropian për Sundimin e Ligjit (EULEX) në rolet e tyre përkatëse si reagues të sigurisë.