Pjesa më e madhe e Evropës po përballet me temperatura të larta me fillimin e gushtit, me disa vende që po e ndjejnë të nxehtit më keq se të tjerat.
Bëhet e ditur Roma në Itali dhe pjesë të Shqipërisë dhe Maqedonisë së Veriut kanë parë disa nga incidentet më të rënda të zjarreve deri më tani këtë vit.
Në Romë, një zjarr i madh dogji rezervatin natyror të Monte Marios.
Zjarrfikësit u panë duke hedhur ujë nga helikopterët mbi zjarrin në zonën kodrinore, ndërsa shumë banorë u evakuuan pasi flakët iu afruan ndërtesave aty pranë.
Siç raportohet, vendndodhja e zjarrit nuk ishte shumë larg studiove të televizionit publik italian RAI dhe vetëm 2.5 kilometra nga Bazilika e Shën Pjetrit në qytetin e Vatikanit.
Ndërkohë, në Shqipëri zjarret kanë vazhduar të digjen, shkruan euronews, përcjell Telegrafi.
Shumë prej tyre iu afruan edhe banesave në fshatin jugor të Mashkullores në rrethin e Gjirokastrës, por pa dëme.
Megjithatë, në qytetin bregdetar të Shëngjinit, situata ishte më e rëndë.
Qindra zjarrfikës, personel ushtarak dhe vullnetarë kanë arritur të kontrollojnë një zjarr të madh i cili dëmtoi ndërtesa dhe lokale në plazh, duke i bërë vizitorët të ikin nga paniku.
Për të shuar flakët në qytet kanë ndihmuar një helikopter Cougar i ushtrisë shqiptare dhe dy aeroplanë italianë Canadair, pjesë e Mekanizmit të Mbrojtjes Civile të Bashkimit Evropian.
Në Maqedoninë e Veriut, një zjarr i madh ka shpërthyer në lindje të Sveti Nikolas.
Për të shuar zjarrin janë angazhuar një helikopter i ushtrisë dhe tre aeroplanë Air Tractor.
Në fshatin Kokoshinje, midis Sveti Nikolas dhe Probishtipit, një i moshuar vdiq nga thithja e tymit, pasi fshati u përfshi nga zjarri.
Kryeministri Hristijan Mickoski e siguroi opinionin se ka mjaft zjarrfikës për menaxhimin e zjarreve, edhe pse ato janë në kulmin historik.
Vetëm ditën e djeshme janë raportuar 66 zjarre aktive në ambiente të jashtme, 40 prej të cilave janë shuar me sukses.
Ndryshe, Serbia i ka huazuar dy helikopterë Maqedonisë së Veriut për të ndihmuar në luftimin e zjarrit të rëndë pyjor që po përhapet pranë manastirit Prohor Pçinjski, në kufirin mes dy vendeve.