Dy persona kanë humbur jetën dhe disa të tjerë janë plagosur si pasojë e zjarreve që kanë përfshirë ishullin grek të Salaminës, në perëndim të Athinës.
Sipas autoriteteve, flakët janë përhapur me shpejtësi në zonat e Kolones dhe Saterlit, duke detyruar nisjen e një operacioni për evakuimin e banorëve.
Departamenti i Zjarrfikësve ka bërë të ditur se trupat e pajetë dyshohet se i përkasin një çifti. Ndërkohë, pesë persona janë dërguar për trajtim në një klinikë lokale, ndërsa disa shtëpi janë dëmtuar nga zjarri.
Për shuarjen e flakëve janë angazhuar rreth 192 zjarrfikës, 14 avionë dhe helikopterë, ekipe vullnetare dhe cisterna uji.
Autoritetet kanë paralajmëruar se erërat e forta po favorizojnë përhapjen e shpejtë të zjarrit, raporton Reuters, transmeton Sinjali.
Zjarret kanë përfshirë disa vende evropiane gjatë kësaj vere, ndërsa temperaturat e larta dhe thatësira kanë krijuar kushte të favorshme për përhapjen e flakëve në Greqi, Spanjë dhe Francë.