Ndërtimi i Xhamisë së Madhe në Prishtinë është paraqitur si një nga projektet më të rëndësishme fetare dhe arkitekturore në Kosovë. Megjithatë, krahas dimensionit fetar dhe simbolik të këtij objekti, lind një pyetje e rëndësishme publike: a po respektohen të drejtat e punëtorëve që po e ndërtojnë atë?/ shkruan TV Arbëria
Sot, në një ditë të diel, kur shumica e qytetarëve gëzojnë të drejtën e pushimit javor, në kantierin e Xhamisë së Madhe punimet vazhdojnë normalisht. Kjo ngre dilema serioze lidhur me respektimin e legjislacionit të punës, orarit të punës dhe të drejtave themelore të punëtorëve.
Nëse një objekt kulti synon të jetë simbol i moralit, drejtësisë dhe respektit për njeriun, atëherë vetë procesi i ndërtimit të tij duhet të reflektojë këto vlera. Besimtarët kanë të drejtë të pyesin nëse punëtorët që po e ndërtojnë këtë objekt po punojnë në kushte të rregullta, nëse kompensohen sipas ligjit për punën gjatë ditëve të pushimit dhe nëse gëzojnë të drejtën e pushimit javor të garantuar me ligj.
Objektet e kultit nuk duhet të ngrihen mbi lodhjen e tepërt dhe shfrytëzimin e punëtorëve. Ato duhet të ndërtohen me dashuri, respekt dhe dinjitet njerëzor. Një xhami nuk është thjesht një ndërtesë prej betoni dhe hekuri; ajo është një simbol i vlerave që predikon. Për këtë arsye, mënyra se si ndërtohet është po aq e rëndësishme sa funksioni që do të ketë nesër.
Prandaj, është në interes të publikut që Inspektorati i Punës të verifikojë nëse në këtë kantier po respektohen standardet ligjore dhe të drejtat e punëtorëve. Transparenca në këtë rast nuk do të ishte sulm ndaj projektit, por mbrojtje e dinjitetit të atyre që me djersën e tyre po e bëjnë të mundur ngritjen e tij.
Në fund, pyetja mbetet e hapur: a mund të ndërtohet një shtëpi e Zotit duke anashkaluar të drejtat e njeriut?
/TV Arbëria