Një burrë i përshkruar si një “vrasës serik” nga policia e Kenias-it u torturua për të bërë një rrëfim, ka thënë avokati i tij në një gjykatë në kryeqytet, Nairobi.
Policia tha se Collins Jumaisi Khalusha, 33 vjeç, rrëfeu se kishte vrarë 42 gra që nga viti 2022, përfshirë gruan e tij, pas arrestimit të tij të hënën.
Ai u arrestua pas zbulimit të fundit të nëntë trupave të gjymtuar në një gurore të braktisur në Nairobi.
Prokurorët mohuan se ai ishte keqtrajtuar dhe gjykata tha se i dyshuari mund të mbahet për një muaj, në pritje të hetimeve të mëtejshme.
Pas seancës, në të cilën Khalusha u shfaq me pranga, por nuk foli, avokati i tij tha se shpresonte se rrëfimi do të fshihej nga të dhënat e gjykatës.
Ai shtoi se kishte kërkuar që klienti i tij të dërgohej në spital për trajtim urgjent, raporton BBC.
Khalusha u arrestua në një bar të hënën herët në mëngjes teksa po shihte finalen e futbollit të Euro 2024 mes Spanjës dhe Anglisë.
Më pas ai i çoi oficerët në shtëpinë e tij pranë vendit të krimit ku u gjetën 10 telefona, një laptop, karta identiteti dhe veshje personale femërore, tha policia.
Që nga e premtja, policia ka rrethuar deponinë, guroren Mukuru, ku trupat u gjetën në faza të ndryshme dekompozimi.
Sipas policisë, viktimat ishin të moshës nga 18 deri në 30 vjeç dhe të gjithë u vranë në të njëjtën mënyrë.
Ka pasur tronditje dhe zemërim në Kenia për vrasjet – dhe zemërim i drejtuar ndaj policisë që krime të tilla mund të kishin kaluar pa u vënë re për kaq gjatë.
Policia e Kenias është akuzuar për abuzime të gjera të të drejtave të njeriut në të kaluarën – dhe forca është aktualisht nën hetim mbi vdekjet dhe rrëmbimet pas protestave të fundit antiqeveritare.