Presidentja e Kosovës, Vjosa Osmani ka ndarë një video nga vizita që pati gjatë ditës tek familja e ish-presidentit, Ibrahim Rugova.
Osmani e cila vizitën e bëri për nder të Ditës së Presidentit, u intervistua nga Liza Beta, mbesa e ish-presidentit Rugova.
Njëra nga pyetjet që iu drejtua presidentes Osmani ishte nëse i takon miqtë e presidentit Rugova gjatë vizitave të saj në Amerikë.
“Po Liza, Presidenti Rugova ka krijuar shumë miq të mëdhenj për Kosovën, dhe kur shkojë në Amerikë dhe në Evropë takojë miqtë e tij që më tregojnë histori të ndryshme. Kosova me të vërtetë është e bekuar që edhe sot i gëzon miqësitë që i ka ndërtuar Presidenti Rugova. Ai e ka lënë një thënie të rëndësishme “Shtëpia nuk mbahet pa miq”, ishte përgjigja e Osmanit.
Osmani bëri të ditur se me Liza Betën, mbesën e presidentit Rugova bashkëbiseduan për vizionin e gjyshit të saj.
“Liza Beta, mbesa e Presidentit Rugova, e bëri edhe më të veçantë sot shënimin e Ditës së Presidentit.
Bashkëbiseduam për vizionin e gjyshit të saj, atit themeltar të Republikës sonë, si dhe trashëgiminë e tij, e cila ka lënë gjurmë të pashlyera, e të cilat do të barten te breza të tjerë pas tij”, shkruan presidentja.