Ministri i Shëndetësisë, Arben Vitia, bashkë me u.d. drejtoreshën e ShSKUK-së, Narqize Arenaliu – Hoxhaj, ia uruan sot detyrën bordit të ri të zgjedhur të ShSKUK-së: Dren Boshnjaku- Qendra Klinike Universitare e Kosovës, Tetore Olloni- Qendra Klinike Universitare Stomatologjike e Kosovës, Rrezarta Bajrami- Instituti Kombëtar i Shëndetit Publik, Besim Demolli- Spitali i Përgjithshëm Ferizaj – në bazë të rotacionit dhe përmbushjes së indikatorëve të kualitetit të shërbimeve shëndetësore, Vjollca Kadolli-Shërbimet e Kujdesit Parësor Shëndetësor dhe Naim Bardiqi- Ministria e Shëndetësisë.
Një ekspert i menaxhmentit shëndetësor do të zgjidhet në bazë të konkursit publik.
Të pranishëm ishin edhe anëtarët e bordit të kaluar të ShSKUK-së: Aida Rexhepi, Agreta Gecaj, Xhevat Jakupil, Mentor Sadiku, Vjollca Kadolli (e riemëruar) dhe Enver Gashi, të cilët ministri Vitia i falënderoi për punën dhe angazhimin e tyre gjatë tre vjetëve.
Ai i dëshiroi suksese bordit të sapoemëruar në angazhimin e përbashkët në të mirë të institucionit dhe në të mirë të shëndetit të qytetareve të Kosovës.
Ministri Vitia i falënderoi anëtarët e bordit të kaluar për përkushtimin dhe angazhimin e tyre të jashtëzakonshëm në një situatë të vështirë siç ishte ballafaqimi me pandeminë COVID -19.
“Në fillim të punës kishim situatën me pandeminë COVID-19 që ishte një sfidë e jashtëzakonshme për sistemin shëndetësor. Duke falënderuar bordin e kaluar arritëm që me shumë punë, angazhim dhe përkushtim, t’ia dalim bashkërisht. Këta individë të jashtëzakonshëm, profesionistë shembull kanë dhënë kontribut kyç gjatë kësaj kohe dhe standardi i cili është ngritur besojmë që do të jetë ndihmesë edhe për bordin aktual për rrugën të cilën e kemi përpara”, tha me ketë rast Vitia.
Më pas, bordi i ri i ShSKUK-së mbajti mbledhjen e parë dhe me votë unanime zgjodhën si kryesues të bordit të ri të ShSKUK-së, përfaqësuesin e Ministrisë së Shëndetësisë, Naim Bardiqi.
/TV Arbëria