Deputeti izraelit Nissim Vaturi, nga i cili Elon Musk u desh të ikte gjatë vizitës së tij në Izrael, përsëriti sot thirrjen për djegien e Rripit të Gazës, duke thënë se “nuk ka të pafajshëm atje”.
Nënkryetari i parlamentit izraelit ( Knesset ) tha në nëntor se Izraeli nuk duhet të bëjë “asgjë më pak se djegien e Rripit të Gazës, duke thënë se “Gaza është Hamasi”.
Ai tha sot për radion Hakol Baramah se nuk pendohet për fjalët e tij dhe se u qëndron atyre, duke shtuar se “është më mirë të digjen ndërtesa sesa të plagosen ushtarë”.
Duke aluduar për palestinezët që mbetën në veri të Rripit të Gazës pas urdhrave të përsëritur të ushtrisë izraelite për t’u larguar nga atje në jug, Vaturi tha se nuk ka mëshirë për ta.
Vaturi tërhoqi vëmendjen e publikut gjatë vizitës së miliarderit amerikan Elon Musk në Izrael në fund të nëntorit të vitit të kaluar.
Në internet u publikua një video ku shihet Vaturi duke u afruar për të bërë një foto me Musk, i cili nuk e kupton menjëherë se kush është ai dhe pranon, por më pas këshilltari i shpjegon se është një politikan izraelit që dëshiron të djegë Rripin e Gazës.
Në atë moment, Mask fjalë për fjalë ikën prej andej dhe Vaturi lëviz sikur dëshiron ta arrijë atë.