Policia ekuadoriane ka shpëtuar 49 persona që u rrëmbyen nga një organizatë kriminale, duke i detyruar të punonin në një minierë, sipas një burimi zyrtar.
“Gjatë një operacioni kundër krimit të organizuar, policia arriti të shpëtojë 49 persona të cilët ishin rrëmbyer nga banda e rrezikshme Los Lobos në provincën e Azuay”, tha presidenca e vendit në Platformën X.
Karteli Los Lobos (“Ujqërit”) është një bandë e përfshirë në trafikun e drogës dhe aktivitete të tjera kriminale në Ekuador.
Sipas Presidencës, janë sekuestruar edhe armë dhe lëndë plasëse. Fotot nga operacioni i policisë, në një vend malor në Ande, tregojnë policë dhe ushtarë të armatosur që hyjnë në tunelet e minierave për të liruar pengjet.
Mes pengjeve të liruar janë një fëmijë dhe tre gra.
