Shiriti i vendosur tregon se në këtë objekt është e ndaluar të punohet.
Gjatë kësaj të enjte në këtë vend, ku po ndërtohet një kompleks banesor në qendër të Lipjanit, kanë mbetur vetëm rrobat e tyre por nuk janë edhe punëtorët.
Një fatkeqësi që ndodhi një ditë më parë, u bë shkas që sot aty të mbretëroj heshtja.
Nga kati i shtatë, derisa ishin duke punuar, ra njëri nga punëtorët rreth 52 vjeçarë.
Ndihma e parë, iu dha në urgjencën e Mjekësisë Familjare në Lipjan, por mjekët këtu, thonë se i njëjti ishte sjell në gjendje të rëndë.
Nga këtu, 52 vjeçari ishte dërguar për në QKUK por vetëm pak orë pas, i njëjti kishte vdekur.
“Lipjan 03.07.2024 – 15:47. Një mashkull kosovar ka ndërruar jetë në QKUK derisa po trajtohej si pasojë e lëndimeve të pësuara pasi ishte rrëzuar nga një objekt ku po punonte. Përveç njësive policore në vendin e ngjarjes ka dalë edhe prokurori dhe inspektori i punës. Dy të dyshuar meshkuj kosovarë (pronari i firmës ndërtimore dhe pronari i pronës) janë arrestuar dhe me urdhër të prokurorit janë dërguar në mbajtje, kurse trupi i pajetë është dërguar në obduksion. Rasti në hetime”.
Dy personat në fjalë, ndodhën në masën e paraburgimit prej 48 orëve, derisa po hetohen për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”
“Rastit të cilit i referoheni, ju njoftojmë se viktima (mashkull) si pasojë e lëndimeve të marra pasi është rrëzuar nga objekti ku punonte, fatkeqësisht nuk ka mundur t’iu mbijetojë plagëve, ku me urdhër të Prokurorit të Shtetit, trupi i pajetë është dërguar në IML, për obduksion. Prokuroria ka lëshuar aktvendim mbi ndalimin e dy (2) personave, për shkak të veprës penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, sipas KPRK-së. Të njëjtit ndodhen nën masën e ndalimit prej 48 orësh. Prokuroria Themelore në Prishtinë në koordinim me njësitë relevante është duke marrë veprime hetimore lidhur me këtë rast”.
Trupi i pajetë i 52 vjeçarit, do të varroset gjatë kësaj të enjte.
Familjarët e të ndjerit kanë hapur dyert për ngushëllime në fshatin Rufc derisa i thanë Dukagjinit se i ndjeri kishte punuar në ndërtimtari për më shumë se dy dekada.