Policia ka dhënë detaje për vdekjen e Agon Zejnullahut, 27-vjeçarit nga Banulla e Lipjanit.
Policia ka bërë të ditur se fillimisht ka pranuar informacion se një person, i cili dyshohej të ishte nën ndikimin e alkoolit, po sulmonte automjete dhe kalimtarë në rrugën “Haradin Bajrami” në Lipjan.
Me të mbërritur në vendin e ngjarjes së bashku me ekipin emergjent, këta të fundit i kanë ofruar Zejnullahut ndihmën e parë.
“Përkundër përpjekjeve, është konstatuar se ai kishte ndërruar jetë.”, ka thënë për TV Arbëria Agron Borovci, zëdhënës i policisë për rajonin e Prishtinës.
Policia ka bërë të ditur se janë ndërmarrë të gjitha veprimet hetimore për ndriçimin e rastit, përfshirë sigurimin e provave materiale dhe intervistimin e dëshmitarëve.
“Me vendim të Prokurorit të Shtetit, është iniciuar hetim penal lidhur me rastin, ndërsa trupi i pajetë është dërguar në Institutin e Mjekësisë Ligjore për obduksion.”, ka deklaruar tutje Borovci.