Në listën e gjatë me më shumë se 60 shtete që do të preken nga tarifat e Administratës së Donald Trump, janë përfshirë edhe Kosova, Shqipëria, Serbia dhe Maqedonia e Veriut.
Sipas tabelës që është bërë publike nga konferenca e Presidentit të SHBA-së, Kosova do të ketë një tarifë prej 10 për qind, ndërsa më e goditura nga këto tarifa në rajon është Serbia.
Për mallrat e importuara nga Shqipëria është vendosur një tarifë prej 10 për qind, ndërsa për ato nga Serbia 37 për qind, nga Bosnja dhe Hercegovina 35 për qind, dhe nga Maqedonia e Veriut 33 për qind.
Tarifat doganore për vendet e Ballkanit:
Kosova: 10%
Shqipëria: 10%
Maqedonia e Veriut: 35%
Bosnja dhe Hercegovina: 35%
Serbia: 37%
Zyrtarë të lartë të Shtëpisë së Bardhë kanë theksuar se tarifa bazë prej 10% do të hyjë në fuqi më 5 prill, ndërsa tarifat reciproke do të hyjnë në fuqi më 9 prill.
Duke folur në Shtëpinë e Bardhë, Trump njoftoi se ndaj importeve nga Kina do të vendoset një tarifë prej 34 për qind, ndaj atyre nga Bashkimi Evropian 20 për qind, nga Koreja e Jugut 25 për qind, nga Japonia 24 për qind dhe 10 për qind për Britaninë e Madhe.
Përqindjet e tarifave doganore ndaj vendeve të Botës
Britania e Madhe: 10%
Bashkimi Evropian: 20%
Japonia: 24%
Koreja e Jugut: 25%
Kina: 34%
Vietnami 46%
Për këto tarifa ka pasur reagime nga Bashkimi Evropian. Goditje të rëndë për ekonominë botërore po e konsideron presidentja e Komisionit Evropian, Ursula von der Leyen, vendimin e presidentit amerikan, Donald Trump, për vendosjen e tarifave universale. Derisa ka thënë se do të prekin konsumatorët në mbarë botën, raporton kp
Në një konferencë për media, Von der Leyen ka paralajmëruar se Bashkimi Evropian është i gatshëm të ndërmarrë kundërmasa nëse bisedimet me Uashingtonin dështojnë.
