Presidentja e Komisionit Evropian, Ursula von der Leyen ka reaguar pas tarifave të reja të vendosura nga Presidenti amerikan Donald Trump.
Von der Leyen vuri theksin te ndikimi negativ që këto tarifa do kenë te konsumatorët dhe bizneset, duke paralajmëruar kundërmasa ndaj tyre.
Presidentja e KE u shpreh se Evropa po finalizon paketën e saj të parë të masave në përgjigje të tarifave të para për çelikun dhe po përgatit kundërmasa të mëtejshme nëse negociatat dështojnë, përcjell RTSh, transmeton KosovaPress.
“Ajo do të ndihet menjëherë nga konsumatorët, duke dëmtuar veçanërisht qytetarët më të rrezikuar,” tha ajo, duke shtuar se “të gjitha bizneset, të mëdha dhe të vogla, do të vuajnë që nga dita e parë. Kostoja e të bërit biznes me Shtetet e Bashkuara do të rritet në mënyrë drastike,” tha ajo. “Dhe për më tepër duket se nuk ka rregull në çrregullim – asnjë rrugë e qartë në kompleksitetin dhe kaosin që po krijohet, pasi të gjithë partnerët kryesorë tregtarë janë goditur. Unë e di se shumë prej jush ndihen të zhgënjyer nga aleati ynë më i vjetër. Ne duhet të përgatitemi për ndikimin që do të ketë në mënyrë të pashmangshme“, deklaroi ajo.
Von der Leyen u ankua gjithashtu për natyrën e gjerë të tarifave, të cilat do të ndikojnë në mënyrë dramatike marrëdhëniet tregtare me atë që ajo e përshkroi si aleatin më të vjetër të Evropës.
Presidentja e KE vuri gjithashtu theksin te pozicioni i Evropës si një front i bashkuar.
“Ne [Evropa] jemi në këtë së bashku: nëse ju përballeni me njërin prej nesh, ju na merrni të gjithëve. Uniteti ynë është forca jonë. Evropa qëndron së bashku – për biznesin, për qytetarët dhe për të gjithë evropianët, dhe ne do të vazhdojmë të ndërtojmë ura me të gjithë ata që si ne kujdesen për tregtinë e drejtë dhe të bazuar në rregulla si bazë për prosperitet”, nënvizoi Von der Leyen.
Në një postim në X, Presidenti i Këshillit Evropian Antonio Costa bëri thirrje për avancimin e negociatave me Indinë dhe partnerë të tjerë kyç.
Në dhjetor, BE dhe Mercosur (blloku tregtar i Amerikës së Jugut të Argjentinës, Brazilit, Paraguajit dhe Uruguait) njoftuan përfundimin e një marrëveshjeje të tregtisë së lirë, të paktën në parim.
Pakti ka ndarë thellësisht kombet në Evropë dhe marrëveshja përballet me një betejë të vështirë për të siguruar miratimin nga 27 vendet anëtare të BE-së.
Tarifat e Trump nxitën gjithashtu edhe reagimin e Tajvanit të cilët e konsideruan vendimin si të paarsyeshëm.
Kabineti i Tajvanit thirri një takim për të dalë me një përgjigje ndaj tarifës prej 32% që do të përballet për eksportet në SHBA.
Autoritetet kineze dhe media shtetërore kanë dënuar tarifat e reja gjithëpërfshirëse të Trump.
Një opinion në Global Times, i cili është i lidhur ngushtë me Pekinin, e përshkroi njoftimin e Trump si “shantazh tarifor”.
Ministria e Tregtisë e Kinës ka dënuar tarifat e SHBA, ndërsa ka premtuar kundërmasa.
Në mesin e vendeve ndodhen edhe Kosova dhe Shqipëria me tarifë me nga 10 për qind, transmeton KP