Presidenti i Shteteve të Bashkuara, Donald Trump, njoftoi të mërkurën se SHBA-ja do të vendosë një tarifë bazë prej 10 për qind për importet nga të gjitha vendet e botës, përfshirë nga Kosova dhe vendet e tjera të Ballkanit Perëndimor.
Ai njoftoi gjithashtu për tarifa më të larta për dhjetëra vende që kanë suficit tregtar me Shtetet e Bashkuara, duke rritur rrezikun për një luftë tregtare dhe rritje të inflacionit.
Ndaj mallrave të importuara nga Kosova është vendosur tarifë prej 10 për qind, ndaj atyre nga Shqipëria 10 për qind, Serbia 37 për qind, Bosnia e Hercegovina 35 për qind, dhe Maqedonia e Veriut 33 për qind.
Lidhur me këtë çështje në një prononcim për TV ARBËRIA, njohësi i çështjeve ekonomike, Jakup Bellaqa ka deklaruar se arsya e këtij vendimi nga SHBA’të është për shkak se e njëjta sipas tij, dëshiron t’i mbrojë produktet e brendshme dhe ta stimulojë ekonominë e saj brenda shtetit.
“Aplikimi tarifave tregtare prej 10% në çdo eksport për SHBA, arsya që është aplikuar është se Amerika dëshiron t’i mbrojë produktet e brendshme dhe ta stimulojë ekonominë brenda shtetit. Gjithashtu të krijojë të hyra buxhetore për arken e shtetit, ta forcoje ekonominë dhe ekonomitë e mëdha ti sfidon dhe të forcohet ekonomikisht e juridikisht, të krijojë mirëqenie socio ekonomike”, tha Bellaqa.
Madje ai theksoi se ky vendim duhet të shihet si normal pasi siç tha ai, presidenti Trump dëshiron që ekonomia kapitaliste të avancohet përballë ekonomisë social demokrate.
“Duhet shikuar si normale sepse deshironë që ekonomia kapitaliste të avancohet përballë ekonomisë social demokrate dhe të veprojnë ligjet ekonomike të tregut të lirë”, tha më tej Bellaqa për TV ARBËRIA.
Ndryshe, Oda Ekonomike Amerikane në Kosovë (OEAK) ka kërkuar nga Qeveria e Kosovës që të tërheqë tarifën doganore prej 10 për qind për mallrat nga Shtetet e Bashkuara të Amerikës.
Kryetari i Odës Ekonomike Amerikane në Kosovë, Arian Zeka, tha se vendosja e tarifës nga SHBA-ja do të afektojë aftësinë e eksportuesve kosovarë dhe do të ulë përparësinë konkurruese të produkteve të Kosovës në tregun amerikan.
Teksa në vendimin e bërë publik më 2 prill, përveç tarifës bazë, presidenti amerikan, Donald Trump, ka vendosur po ashtu tarifa më të larta për dhjetëra vende që kanë suficit tregtar me SHBA-në, duke rritur rrezikun për një luftë tregtare dhe rritje të inflacionit./E.Salihu./TV ARBËRIA