Talibanët hodhën poshtë të martën shumë misione diplomatike afgane jashtë shtetit, duke thënë se nuk do të respektojnë pasaportat, vizat dhe dokumentet e tjera të lëshuara nga diplomatë të lidhur me ish administratën e Afganistanit të mbështetur nga Perëndimi.
Është përpjekja e fundit e talebanëve për të marrë kontrollin e misioneve diplomatike, që nga kthimi në pushtet në vitin 2021. Shumë nga udhëheqësit e tyre janë nën sanksione dhe asnjë vend nuk i njeh ata si sundimtarë legjitimë të Afganistanit.
Në një deklaratë të postuar në platformën e mediave sociale X, Ministria e Punëve të Jashtme tha se dokumentet e lëshuara nga misionet në Londër, Berlin, Belgjikë, Bon, Zvicër, Austri, Francë, Itali, Greqi, Poloni, Australi, Suedi, Kanada dhe Norvegji, nuk pranohen më dhe se ministria “nuk mban asnjë përgjegjësi” për ato dokumente.
Dokumentet e prekura përfshijnë pasaportat, ngjitësit e vizave, aktet dhe miratimet.
Ministria shkroi se njerëzit në ato vende do të duhet t’u drejtohen ambasadave dhe konsullatave të kontrolluara nga qeveria e Emirateve Islamike të Afganistanit të Talibanëve.
“Të gjithë shtetasit afganë që jetojnë jashtë vendit dhe të huajt mund të vizitojnë misionet politike dhe konsullore të IEA në vende të tjera, përveç misioneve të lartpërmendura, për të pasur akses në shërbimet konsullore”, thuhet në deklaratë.
Në mars të vitit 2023, talebanët thanë se po përpiqeshin të merrnin përgjegjësinë për më shumë ambasada afgane jashtë vendit. Zëdhënësi i tyre kryesor, Zabihullah Mujahid, tha se administrata kishte dërguar diplomatë në të paktën 14 vende.
Ambasadat afgane në Spanjë dhe Holandë tetorin e kaluar theksuan se po punonin me autoritetet talebane në Kabul, pasi talebanët pezulluan shërbimet konsullore në ambasadat në Londër dhe Vjenë, për shkak të “mungesës së transparencës dhe bashkëpunimit”.
Disa vende mbajnë një mision diplomatik aktiv në Afganistan, duke përfshirë Pakistanin dhe Kinën.
Kufizimet për gratë dhe vajzat janë një pengesë e madhe për talibanët që të fitojnë njohjen zyrtare, si qeveria legjitime e vendit. Ata kanë ndaluar arsimimin e femrave përtej klasës së gjashtë dhe i kanë ndaluar femrat nga shumë punë dhe në shumicën e hapësirave publike.
Në një raport të botuar të martën, misioni i OKB-së në Afganistan tha se zyrtarët e inteligjencës në maj mbyllën me forcë zyrën e një grupi joqeveritar të udhëhequr nga grate, për lejimin e disa prej punonjëseve të tij femra të raportoheshin fizikisht në punë.
OJQ-ja u lejua të rihapej ditë më vonë, pasi nënshkroi një letër që thoshte se nuk do të lejonte gratë punonjëse të vinin në zyrë, sipas raportit të fundit të misionit mbi të drejtat e njeriut në vend. Raporti nuk e zbuloi vendndodhjen për “arsye mbrojtjeje”.
Ai tha gjithashtu se në provincën jugore të Zabulit, zyrtarë nga policia morale e talebanëve u thanë kompanive të transportit dhe komandantëve të pikave të kontrollit, se grave u ndalohej të udhëtonin pa një kujdestar mashkull.
“Ata paralajmëruan se ata që shkelin urdhrin do të përballeshin me pasoja të rënda”, shtoi raporti.
Askush nga talebanët nuk ishte menjëherë i disponueshëm për koment mbi raportin e misionit.