Një tjetër rast shqetësues ka ndodhur në prokurimin publik. Kompanive Auto Europa Cras SH.P.K dhe Bastri Ademi B.I., në pronësi të Bastri Ademit, u është refuzuar ankesa nga OSHP-ja pasi kanë dorëzuar një dokument të falsifikuar në emër të kompanisë TehnoAuto.
Sipas vendimit të OSHP-së, gjatë verifikimit të dokumenteve është zbuluar se pajisja e paraqitur nga Auto Europa Cras SH.P.K dhe Bastri Ademi B.I. nuk ishte nga kompania TehnoAuto. Ky fakt është konfirmuar zyrtarisht edhe nga vetë TehnoAuto, e cila ka vërtetuar se pajisja ishte e falsifikuar.
Në qershor të vitit 2025, Ministria e Mjedisit, Planifikimit Hapësinor dhe Infrastrukturës kishte publikuar tenderin për servisimin dhe mirëmbajtjen e veturave zyrtare të MMPHI-së. Në garë ishin dy kompani:
– Grupi i Operatorëve Ekonomik Auto Europa Cras SH.P.K – Bastri Ademi B.I.
– Gani B. Krasniqi B.I. – D.P.Z. “Suzuki”
Më 10.09.2025, ministria shpërbleu me kontratë operatorin ekonomik Gani B. Krasniqi B.I.–D.P.Z “Suzuki”, me çmim 90,299.76 euro, duke e eliminuar nga gara grupin tjetër ofertues me çmim më të ulët (71,509.60 euro), pasi nuk kishte përmbushur kriteret e njoftimit për kontratë dhe dosjes së tenderit. Si palë e pakënaqur, grupi Auto Europa Cras SH.P.K – Bastri Ademi B.I. parashtruan ankesë në OSHP më 25.09.2025.
OSHP-ja konstatoi se grupi kishte paraqitur një dokument të falsifikuar, duke e refuzuar ankesën si të pabazuar. Për të njëjtin kriter, ata ishin eliminuar edhe fillimisht nga ministria.