Sekretari amerikan i Shtetit, Antony Blinken po qëndron në kryeqytetin izraelit, Tel Aviv pasi ka takuar disa liderë botërorë, në vazhdën e përpjekjeve për të përfunduar luftën izraelito-palestineze.
Zyrtari amerikan ka mbajtur sot një konferencë për shtyp, ku ka folur rreth një zgjidhje të qëndrueshme të paqes mes Izraelit dhe Palestinës.
Ai thotë se “çdo partner që takova në këtë udhëtim tha se ata janë të gatshëm të mbështesin një zgjidhje të qëndrueshme [paqes]” që i jep fund “ciklit të gjatë të dhunës dhe garanton sigurinë e Izraelit”.
Ai shton se fuqitë rajonale arabe – disa prej të cilave ai i ka vizituar tashmë – nuk shohin një të ardhme pa një shtet të pavarur palestinez.
“Këto qëllime janë të arritshme… nuk mund të kesh njërën pa tjetrën”, thotë ai, raporton skynews.
Izraeli “duhet të jetë një partner” i udhëheqësve palestinezë dhe të jetë i lumtur duke jetuar krah për krah me ta, shton ai.
“Dhe Izraeli duhet të ndalojë së ndërmarrë hapa që dëmtojnë aftësinë e palestinezëve për të qeverisur veten”, thotë ai, duke iu referuar kolonëve ekstremistë dhe të dhunshëm hebrenj që zhvendosin palestinezët nga toka e tyre.
Më pas ai i drejtohet Autoritetit Palestinez – objekt i shumë diskutimeve javët e fundit.
“Autoriteti Palestinez ka gjithashtu një përgjegjësi për të reformuar veten për të përmirësuar çështjet e qeverisjes së tij – unë planifikoj të diskutoj me presidentin Mahmoud Abbas, ndër të tjera, kur të takohemi nesër”, thotë ai.
Diplomati amerikan tha se kur bëhet fjalë për të ardhmen e Gazës pas luftës, “njerëzit duhet të paguhen”.
“Ata duhet të jenë në gjendje të bëjnë punën e nevojshme për të administruar Gazën, për të bërë gjërat e tjera që do të jenë kritike sapo të përfundojë konflikti”, deklaroi Sekretari amerikan i Shtetit.
Ndryshe, Izraeli ka nisur një ofensivë në Rripin e Gazës pas sulmeve terroriste të 7 tetorit të militantëve të Hamasit në territoret izraelite.