Shoqata Intelektuale “Isniqi” nga Isniqi ka reaguar ashpër ndaj rrafshimit dhe largimit të tre varreve të të parëve të Isniqit në varrezat e Ibërdemajve, të cilat u përkisnin të ndjerëve Canë Leka, Nikë Leka dhe Prekë Leka.
Përmes një deklarate publike, shoqata e ka cilësuar këtë veprim si një cenim të rëndë të kujtesës historike, dinjitetit të të parëve dhe trashëgimisë kulturore e shpirtërore të Isniqit. Sipas saj, varret përfaqësojnë dëshmi të identitetit dhe vazhdimësisë së komunitetit ndër breza, ndërsa fakti që ato i përkisnin besimit katolik e bën edhe më të domosdoshëm trajtimin e tyre me respekt të veçantë.
Shoqata vlerëson se rrafshimi i varreve pa transparencë dhe pa konsultim me familjarët e komunitetin është i papranueshëm dhe krijon një precedent të rrezikshëm për trashëgiminë historike e fetare të Isniqit.