Shkëlzen H. Dakaj ka njoftuar se do t’i drejtohet gjykatës pas deklaratave publike të Valon Ramadanit, duke thënë se përballja mes tyre do të zhvillohet mbi bazën e fakteve dhe dokumenteve, e jo të spekulimeve dhe shpifjeve.
Përmes një reagimi publik, Dakaj ka deklaruar se procesi gjyqësor do të jetë mundësi për të vërtetuar pretendimet e bëra në publik dhe për të sqaruar çështjet që, sipas tij, lidhen me pasurinë shtetërore dhe procedurat e privatizimit.
Ai ka theksuar se hulumtimet e mediumit Infokusi lidhur me tjetërsimin e tokave shtetërore përmes procedurave të negociuara me Agjencinë Kosovare të Privatizimit do të vazhdojnë, duke premtuar publikimin e dokumenteve dhe dëshmive që konsiderohen me interes publik.
Dakaj ka pretenduar se babai i Valon Ramadanit ka përfituar tokë përmes një procedure të negociuar me AKP-në, ndërsa ka kërkuar transparencë të plotë për të gjitha pronat publike të tjetërsuara gjatë vitit 2025.
Sipas tij, qytetarët kanë të drejtë të informohen për përfituesit e pronave publike dhe për mënyrën se si janë zhvilluar këto transaksione. Ai ka bërë të ditur se, pas mosveprimit të AKP-së ndaj kërkesave për qasje në dokumente publike, çështja është dërguar në Agjencinë për Informim dhe Privatësi.
Në fund, Dakaj është shprehur i bindur se dokumentet dhe të dhënat që lidhen me këto transaksione do të bëhen publike dhe se, sipas tij, e vërteta do të dalë në dritë.