Shtetet e Bashkuara i vendosën veton të mërkurën një projekt-rezolute të OKB-së që parashikonte një armëpushim të menjëhershëm të luftës në Gazë, pasi ajo nuk e lidhte këtë kërkesë me lirimin e menjëhershëm të pengjeve që mbahen nga Hamasi që nga sulmi ndaj Izraelit në tetor 2023.
Këshilli i Sigurimit i OKB-së votoi me 14 vota pro dhe 1 kundër për projekt-rezolutën e propozuar nga 10 anëtarë jo të përhershëm të Këshillit prej 15 anëtarësh, por ajo nuk u miratua për shkak të vetos së SHBA-së.
Dokumenti i paraqitur për votim “kërkonte një armëpushim të menjëhershëm, të pakushtëzuar dhe të përhershëm që të respektohej nga të gjitha palët, dhe më tej përsëriste kërkesën e saj për lirimin e menjëhershëm dhe pa kushte të të gjithë pengjeve”.
Ndryshe nga pesë anëtarët e përhershëm – SHBA, Rusia, Kina, Britania dhe Franca – anëtarët e zgjedhur nuk kanë të drejtë vetoje.
Në qershor Këshilli i Sigurimit miratoi rezolutën e tij të parë mbi një plan armëpushimi që synonte t’i jepte fund luftës midis Izraelit dhe Hamasit.
Rezoluta e mbështetur nga SHBA-ja përshëndeste një propozim armëpushimi të shpallur nga Presidenti Joe Biden që Shtetet e Bashkuara thanë se Izraeli e kishte pranuar.
Aty i bëhej thirrje grupit palestinez Hamas, që konsiderohet një organizatë terroriste nga Shtetet e Bashkuara që të pranonte një plan me tre faza – por lufta ka vazhduar.