Kancelari gjerman, Olaf Scholz, ka thënë se i dyshuari afgan për sulmin me veturë në Munich nga ku mbetën të lënduar 28 persona duhet të dënohet dhe të dëbohet nga Gjermania.
“Ky autor nuk mund të shpresojë për ndonjë butësi. Ai duhet të ndëshkohet dhe duhet të largohet nga vendi”, u tha Scholz gazetarëve.
“Nëse ishte sulm, ne duhet të ndërmarrim veprime të vazhdueshme kundër autorëve të mundshëm me të gjitha mjetet e drejtësisë”, shton ai, shkruan BBC, transmeton Gazeta Express.
Një veturë u përplas me një grup njerëzish në një tubim sindikal në Mynih më herët sot.
Incidenti ndodhi në Seidlstrasse, në qendër të Mynihut – qyteti i tretë më i madh i Gjermanisë për nga popullsia.
Sipas përditësimit të fundit të policisë, të paktën 28 persona u plagosën, disa prej tyre janë në gjendje të rëndë.
Policia thotë se shoferi ishte një azilkërkues afgan 24-vjeçar, i cili njihej për vjedhje dhe drogë.