Sindikata e Bashkuar e Arsimit ka shprehur shqetësim për shkarkimin e drejtorëve te shkollave për inate politike. Sipas SBASHK-ut gjatë viteve të fundit janë regjistruar dhjetëra raste të shkarkimit të drejtorëve të shkollave për shkaqe politike. Edhe pse rastet janë fituar nga gjykata, ato nuk po zbatohen nga DKA-të.
Arben Zeqiri, ishte drejtor i shkollës “Lasgush Poradeci” në Muzeqinë të Shtimes, por thotë se u largua nga posti i tij për shkaqe politike.
Zeqiri tash e një vit po kërkon rikthimin në vendin e tij të punës e në favor të tij vendosi edhe Gjykata Themelore në Ferizaj, por deri tash nuk është zbatuar vendimi.
“Më 13 korrik kam paraqitur kërkesën për pushim vjetor, kur se më 14 korrik unë jam shkarkuar nga pozita e drejtorit, kryekëput me inate politike që burojnë nga motive kryesisht politike. Pastaj unë kam kërkuar drejtësi në këtë proces dhe kam filluar kërkesë padinë në Gjykatën Themelore në Ferizaj dhe më 8 maj 2022 Gjykata Themelore ka dhënë verdiktin e saj dhe ka anuluar vendimin e pa ligjshëm të kryetarit të Komunës”, ka thënë Zeqiri.
Sipas SBASHK-ut, në të gjithë vendin janë dhjetëra raste që drejtorët janë shkarkuar për shkaqe politike pas ndërrimeve të pushteteve në komuna.
Fejzullah Vranovci, anëtar i Këshillit të përgjithshëm të SBASHK-ut, njëherësh kryetar i Sindikatës së Arsimit në Komunën e Ferizajt, ka thënë se institucionet qendrore duhet të angazhohen në ndryshim të ligjeve që drejtorët e shkollave të zgjidhen nga vetë shkolla e jo nga komunat.
“Kemi raste edhe në komunën tonë që nuk është kthyer në vendin e punës dhe nuk punon, e ka kryer mandatin dhe nuk është në vendin e punës. Sa është shqetësuese po e marrim në përgjithësi në nivel të Kosovës se me një udhëzim administrativ është e padrejtë sepse shumica e drejtorëve më nuk konkurrojnë”, ka thënë Vranoci.
E marrim rastin e Kaçanikut e kemi raste edhe me Ferizajn e të tjerë se hapen konkurse dhe nuk konkurron askush, paga është e njëjtë si e mësimdhënësit, pse me marrë përgjegjësi”.
“Me ndryshimin e politikave po ndodhin edhe ndryshimet me drejtorët e shkollave gjë që nuk është dashur të ndodh. Duhet të bëhet një decentralizim i kolektivit të shkollave dhe përzgjedhja e drejtorëve të bëhet pak më e mirë, megjithatë ky problem është në krejt Kosovën”, ka thënë Visar Islami, nënkryetar i Këshillit të Prindërve të Kosovës.
Në Ministrinë e Arsimit kanë thënë se çdo personi të zgjedhur në pozitën e drejtuesit të shkollës, sipas udhëzimeve administrative i ruhet vendi i punës në shkollën nga vjen.
“Çdo personi të zgjedhur në pozitën e drejtuesit të shkollës, sipas nenit 13 të këtij UA i ruhet vendi i punës në shkollën nga vjen. Si Ministri nuk kemi pranuar ndonjë ankesë që komunat e kanë privuar dikë nga kjo e drejtë. UA nr.151/2020, neni 6, paragrafi 3.1 përcakton se njëri nga anëtarët mund të jetë nga Këshilli i prindërve në nivel komune me kualifikim dhe ekspertizë në fushën e edukimit, por kjo vendoset nga komunat. Po ashtu në cilësinë e vëzhguesit janë edhe Këshilli drejtues i shkollës, një prind dhe një mësimdhënës”, thuhet në përgjigjen e MASHTI-t.
E Komuna e Shtimes nuk u është përgjigjur pyetjeve të KOHËS lidhur me këtë çështje.
