Ndihmësi i lartë i presidentit rus Vladimir Putin për politikën e jashtme tha të enjten se ai i kishte thënë Washingtonit se një armëpushim 30-ditor i propozuar nga Shtetet e Bashkuara për të ndalur luftën në Ukrainë thjesht do t’u jepte forcave të Kievit një pushim shumë të nevojshëm në fushën e betejës.
Përparimet e Rusisë përgjatë frontit që nga mesi i vitit 2024 dhe përpjekja e Presidentit të SHBA-së, Donald Trump për të arritur një marrëveshje paqeje për t’i dhënë fund konfliktit tre-vjeçar në Ukrainë, kanë ngritur frikën se Kievi, i cili mbështetej nga Perëndimi, mund ta humbiste luftën.
I dërguari special i Trump për Lindjen e Mesme, Steve Witkoff, mbërriti në Moskë të enjten për bisedime.
Zyrtarët rusë thanë se këshilltari amerikan për sigurinë kombëtare, Mike Waltz, kishte dhënë detaje mbi idenë e armëpushimit të mërkurën dhe Rusia ishte gati ta diskutonte atë, raporton Reuters.
Trump kishte thënë në Shtëpinë e Bardhë të mërkurën se shpresonte se Kremlini do të pajtohej me propozimin e SHBA-së për një armëpushim 30-ditor që Ukraina tha se do ta mbështeste.
Yuri Ushakov, një ish-ambasador në Uashington, i cili flet në emër të Putinit për çështjet kryesore të politikës së jashtme, i tha mediave ruse se ai kishte folur me Waltz të mërkurën për të përshkruar pozicionin e Rusisë për armëpushimin.
“Kam deklaruar qëndrimin tonë se ky nuk është gjë tjetër veçse një pushim i përkohshëm për ushtrinë ukrainase, asgjë më shumë”, tha Ushakov.
“Kjo nuk na jep asgjë. Ajo vetëm u jep ukrainasve një mundësi për t’u rigrupuar, për të fituar forcë dhe për të vazhduar të njëjtën gjë,” shtoi ai më vonë. Ushakov tha se qëllimi i Moskës ishte “një zgjidhje paqësore afatgjatë që merr parasysh interesat legjitime të vendit dhe shqetësimet tashmë të njohura”.
“Më duket se askush nuk ka nevojë për ndonjë hap që (thjesht) imiton veprime paqësore në këtë situatë,” tha ai.
I pyetur nëse Rusia po e refuzonte propozimin e SHBA-së, Ushakov, i cili ka shërbyer së bashku me Putinin në Kremlin që nga viti 2012, tha se presidenti ka të ngjarë të flasë me media më vonë të enjten dhe të përshkruajë pozicionin e Rusisë në më shumë detaje.