Reagimi i Odës Amerikane ndaj Qeverisë, Bajraktari: Krerët shtetërorë të jenë shembull i respektimit të vendimeve të Gjykatave, në mënyrë që Kosova të përçojë mesazh që është shtet i së drejtës

Oda Ekonomike Amerikane në Kosovë ka shprehur shqetësimin e saj të thellë lidhur me deklarimin e Qeverisë së Kosovës, se odat ekonomike nuk duhet të komentojnë çështjet që kanë të bëjnë me promovimin e sundimit të ligjit dhe llogaridhënies në qeverisje, dhe se deklaratat e tilla janë të motivuara politikisht.

Kjo odë e ka cilësuar shqetësues, insistimin e pushtetit ekzekutiv që të diktojë diskursin e akterëve joshtetërorë, e bartësve të pushteteve të pavarura, përmes përpjekjeve për delegjitimim të qëndrimeve të tyre.

“Si një organizatë që për më shumë se dy dekada ka avokuar për një mjedis më të favorshëm afarist në Kosovë, ODA Amerikane beson fuqishëm se keqpërdorimet e pretenduara në prokurimin publik minojnë konkurrencën e drejtë ndërmjet operatorëve ekonomikë dhe çojnë në keqpërdorimin e mundshëm të fondeve publike, duke cenuar kështu besimin e tatimpaguesve”, thuhet në reagim.

Derisa avokati e njohësi i çështjeve juridike, Ardian Bajraktari në një prononcim për TV ARBËRIA, ka deklaruar se aspekti i zhvillimit ekonomik, krijimi i një klime për tërheqje të investitorëve të ndryshëm nga jashtë, është jashtëzakonisht i rëndësishëm dhe i ndërlidhur me aspektin e sundimit të ligjit.

Në këtë aspekt, ai vlerëson se krerët shtetërorë duhet të jenë shembull i respektimit të vendimeve të Gjykatave në mënyrë që  siç tha ai, Kosova të përçojë një mesazh që është shtet i së drejtës, ku sundon rendi dhe ligji.

“Është shumë e rëndësishme dhe determinuese të dihet që aspekti i zhvillimit ekonomik, krijimi i një klime për tërheqje të investitorëve të ndryshëm nga jashtë është jashtëzakonisht i rëndësishëm dhe i ndërlidhur me aspektin e sundimit të ligjit. E sundimi i ligjit ndërlidhet me aspektin e zbatimit të organeve të drejtësisë në përgjithësi e gjykatave në veçanti. Prandaj vlerësoj që në këtë funksion, para se gjithash krerët e lartë shtetërorë duhet të jenë shembull i rrespektimit të vendimeve të Gjykatave në mënyrë që Kosova të përçojë një mesazh që është shtet i së drejtës, është shtet ku sundon rendi dhe sundon ligji”, tha Bajraktari për TV ARBËRIA.

Ndryshe, Oda Ekonomike Amerikane ka thënë se “Kosova ka ndërmarrë përpjekje të jashtëzakonshme për të ndërtuar themele të forta të demokracisë, dhe asnjë përpjekje nuk mund të cenojë suksesin e arritur.Çdo odë ekonomike, organizatë e shoqërisë civile, media, e hisedar tjetër jo-shtetëror, ka për obligim dhe duhet të avokojë fuqishëm në kërkim të llogaridhënies dhe transparencës. Është e domosdoshme që institucionet e drejtësisë të lejohen të kryejnë punën e tyre pa ndërhyrje dhe që të gjithë të bashkëpunojnë me to, duke konfirmuar në këtë mënyrë rëndësinë e një sistemi të pavarur dhe funksional të drejtësisë, si themel i një ekonomie të qëndrueshme dhe konkurruese”./E.Salihu.