Presidenti i zgjedhur i Shteteve të Bashkuara, Donald Trump, do të nënshkruajë 11 urdhra ekzekutivë që ndërlidhen me kufirin, përfshirë një me të cilin do të autorizohet dislokimi i trupave amerikane në kufi, raporton televizioni amerikan “Fox News”.
Ky televizion raporton se në një urdhër, Trumpi do ta udhëzojë menjëherë qeverinë federale për ta rinisur ndërtimin e murit kufitar, t’u japë fund politikave të faljes së dënimeve të epokës së Joe Bidenit dhe për ta rikthyer politikën e njohur is “Qëndro në Meksikë”, sipas së cilës azilkërkuesit ishin detyruar që të prisnin në qytete të rrezikshme kufitare, përderisa aplikacionet e tyre po shqyrtoheshin, raporton gazeta “The Guardian”.
Me një urdhër tjetër do të urdhërohen trupa amerikane që të dislokohen në kufi nën Komandën Veriore të ShBA-së dhe “do të udhëzohet ushtria që t’i bëjë prioritet kufijtë tanë dhe integritetin territorial në planifikimin strategjik për operacionet e saj”, thuhet më tej në raportin e mediumit amerikan.
Më tej, përmes një urdhri tjetër, kartelet dhe organizatat ndërkombëtare do të futen në listën e Organizatave të Huaja Terroriste (FTO) dhe Terroristë Globalë të Listuar Posaçërisht (SDGT), veprim që do të mundësojë veprime të shënjestruara kundër anëtarëve, përfshirë ndëshkimet financiare.
Ky urdhër do të jetë i treti nga 11 urdhra ekzekutivë të lidhur me kufirin që Trumpi pritet t’i nënshkruajë të hënën, thuhet në raport.
Pritet që presidenti t’i njoftojë disa prej tyre gjatë fjalimit të inaugurimit të tij, ndërsa të tjerë gjatë nënshkrimeve në Shtëpinë e Bardhë./Nacionale
