Kryetari i Partisë Demokratike të Kosovës, Memli Krasniqi, ka thirrur sot në orën 12:30 një mbledhje me deputetët e kësaj partie.
Mësohet se takimi i Grupit Parlamentar ka nisur.
Ende nuk janë bërë publike arsyet e mbledhjes.
Po ashtu, është paralajmëruar se në orën 14:00 Krasniqi do të mbledhë edhe Kryesinë e partisë.
Këto zhvillime vijnë vetëm një ditë pasi deputetët e PDK-së abstenuan në votimin për Dimal Basha si kryetar i Kuvendit. Ky qëndrim erdhi ndonëse PDK kishte deklaruar më herët se do ta mbështeste kandidatin e Lëvizjes Vetëvendosje, nëse ai nuk do të kishte qenë pjesë e Qeverisë Kurti. Megjithatë, partia zgjodhi të abstenojë, edhe pse Basha nuk kishte qenë pjesë e ekzekutivit.