Analisti politik Burim Ramadani ka reaguar lidhur me situatën aktuale politike dhe institucionale në Kosovë, duke theksuar se vendi ndodhet në një krizë të thellë dhe se është e domosdoshme formimi i një Qeverie Stabilizuese nga partitë e tjera politike.
Sipas Ramadanit, Kosova po përballet me pasoja serioze nga bllokada institucionale e vitit 2025 dhe nga “keqqeverisja dhe izolimi katërvjeçar” që, sipas tij, e kanë futur vendin në një fazë të rrezikshme.
“Kosova sot është në krizë të thellë institucionale e politike. Kjo pasojë e bllokadës së shtetit në vitin 2025, por edhe keq-qeverisjes dhe izolimit katërvjeçar”, ka shkruar Ramadani.
Ai ka paralajmëruar se nesër pritet të jepet përgjigja nëse Kosova do të arrijë të shmangë kolapsin buxhetor, të cilin e ka cilësuar si rrezik real për shtetin.
“Duhet dhënë garanci për mirëmbajtjen e sigurisë publike dhe promovimin e sigurisë kombëtare. Prandaj, besoj se një Qeveri Stabilizuese është e domosdoshme”, ka theksuar ai.