Ka nisur faza e dytë e investimit në Pediatrinë e Tiranës, ku pritet të bëhet një rehabilitim nga themelet. Kryeministri i Shqipërisë, Edi Rama zhvilloi sot një vizitë në pediatri, ku tha se spitali i fëmijëve në QSUT do të modernizohet. Po ashtu, për të gëzuar të vegjlit në prag të festave, Rama u shpërndau edhe disa dhurata.
“Në Pediatrinë e Tiranës, ku çelet investimi i ri për fazën e dytë të modernizimit të spitalit të fëmijëve në QSUT, dhe për të gëzuar sadopak të vegjlit që në këtë vigjilje Krishtlindje, po marrin trajtim, nën kujdesin e stafeve mjekësore”, tha ai.
Ministrja e Shëndetësisë, Ogetrta Manastirliu u shpreh se me fazën e dytë të investimit, do të kryhet i gjithë rehabilitimi i strukturës spitalore, shkruan Rtsh.
“Faza e dytë zeron të gjithë rehabilitimin e strukturës pediatrike. Janë 120 shtretër dhe përfshihen të gjitha shërbimet e pediatrisë së përgjithshme. Është një investim i buxhetit të shtetit, 6.6 mln euro. Me fazën e dytë kompletohet i gjithë spitali pediatrik. Do ketë një rehabilitim nga themelet”, u shpreh ministrja. /TV Arbëria