Shqipëria e sheh të ardhmen e përbashkët në paqe me fqinjët dhe në bashkëveprim me partnerët, tha kryeministri Edi Rama në fjalën e mbajtur në samitin Ukrainë-Evropa Juglindore që po zhvillon punimet sot në Tiranë.
Rama foli për situatën në rajonin e Ballkanit Perëndimor.
“Hedh sytë rreth kësaj tryeze, shoh fytyra të njohura, fytyra miqësore. Pas një historie të gjatë luftërash konfliktesh, marrëdhëniesh të ngrira të gjithë ne këtu në Ballkanin Perëndimor jemi bërë bashkë për të paktën një dekadë për t’u takuar, për të folur mbi sfidat tona, për të planifikuar të ardhmet tona, pavarësisht asaj për të cilën ende nuk mund të biem dakord, për të parë përpara në vend se të shohim pas historinë brutale të ndasive të përgjakshme që na kanë mbajtur peng për kaq shumë brezni”, u shpreh Rama.
Kryeministri theksoi se “e ardhmja që ne në Shqipëri shohim është e ardhmja e përbashkët ku jetojmë në paqe me fqinjët, ku punojmë në bashkëveprim me partnerët tanë e qëndrojmë në miqësi me botën”.
“Prania juaj këtu zoti President na bën thirrje që të pranojmë diçka me një rëndësi të jashtëzakonshme që e njëjta shpresë që na ka bërë bashkë ne përgjatë viteve na bashkon tanimë me popullin e Ukrainës”, tha Rama.
/TV Arbëria
