Qendrim Kryeziu ka shpallur kandidaturën e tij për zgjedhjet e 7 qershorit, si pjesë e listës së Partisë Demokratike të Kosovës, me përkrahjen e kryeministrit në ardhje Bedri Hamza.
Ky vendim vjen si pjesë e angazhimit të tij në jetën politike dhe publike, pas një karriere të gjatë në fushën e ndërmarrësisë dhe zhvillimit ekonomik në vend.
Kryeziu vjen nga një familje me traditë të theksuar kombëtare. Ai thekson se prindi i tij, Hamdi Kryeziu, ka qenë një nga njerëzit më të afërt të Fehmi Aganit, ndërsa daja i tij ka qenë i përfshirë në organizimin e celulave të para të Ushtrisë Çlirimtare të Kosovës.
Në deklarimin e tij publik, Kryeziu ka theksuar se që në moshë të re i është rrënjosur ndjenja e detyrimit për mbrojtjen e vlerave dhe trashëgimisë kombëtare.
Duke folur për angazhimin e tij profesional, ai ka thënë se është i përfshirë në fushën e ndërmarrësisë dhe se synimi i tij është zhvillimi ekonomik dhe hapja e vendeve të reja të punës në Kosovë.
Ai ka kritikuar gjendjen aktuale ekonomike, duke theksuar se bizneset po përballen me sfida të mëdha dhe se shumë të rinj po e shohin të ardhmen e tyre jashtë vendit.
Si kandidat për deputet, Kryeziu është zotuar se do të angazhohet për forcimin e bashkëpunimit ndërmjet shtetit dhe sektorit privat, me qëllim të mbrojtjes dhe krijimit të vendeve të reja të punës në Kosovë.