Qëndrim Kryeziu ka deklaruar se Kosova ndodhet para një situate që ai e cilëson si “rrezik ekzistencial”, duke kritikuar qeverisjen aktuale dhe duke theksuar nevojën për ndryshim politik.
Sipas tij, “eksperimentet e Albin Kurtit” duhet të ndalen sa më shpejt, ndërsa këtë proces ai e sheh si mision që, sipas tij, mund ta udhëheqë më së miri Partia Demokratike e Kosovës.
Kryeziu ka bërë thirrje për zgjerim të bashkëpunimit politik, duke përmendur mundësinë e përfshirjes së Ramush Haradinaj me subjektin e tij, si dhe subjekteve të tjera si Lëvizja për Bashkim, PSHDK dhe Balli Kombëtar.
Një pjesë të veçantë të deklaratës ai ia ka kushtuar Fatmir Limajt, për të cilin ka thënë se prania e tij në listën e PDK-së do të ishte e dobishme si për partinë, ashtu edhe për vetë Limajn. Sipas Kryeziut, nëse Limaj mbetet brenda listës zgjedhore të PDK-së dhe renditet ndër më të votuarit, kjo do të mund të sillte deri në 7–8 deputetë shtesë për grupin parlamentar.