Qëndrim Kryeziu ka reaguar ashpër ndaj zhvillimeve të fundit politike, duke akuzuar kryeministrin Albin Kurti për lëshime ndaj Serbisë dhe për përmbushje të kërkesave të saj në Kosovë.
Sipas Kryeziut, deklaratat e Nenad Rashiqit po konfirmojnë, pikë për pikë, atë që ai e kishte paralajmëruar më herët lidhur me veprimet e Qeverisë së Kosovës. Ai thotë se kryeministri Kurti jo vetëm që ka pranuar t’ia japë Manastirit të Deçanit rreth 25 hektarë tokë, por gjithashtu është zotuar edhe për themelimin e Asociacionit të komunave me shumicë serbe.
Kryeziu pretendon se përmes këtij mekanizmi, sipas tij, rrezikohet të legalizohet ndikimi i Serbisë në territorin e Republikës së Kosovës. Ai shton se, sipas interpretimit të tij, kryeministri Kurti po tenton që realizimin e këtyre qëllimeve ta bëjë përmes Nenad Rashiqit.
“Siç e kam potencuar para dy ditësh, ashtu siç ia ka falur tokat Manastirit të Deçanit, ashtu e ka falur edhe veriun”, ka deklaruar Kryeziu, duke shtuar se, sipas tij, këto qëndrime mund të dëgjohen edhe nga vetë përfaqësuesit serbë në Kosovë.