Qëllimi përfundimtar i presidentit rus Vladimir Putin është të “shkatërrojë” aleancën ushtarake të NATO-s, thotë presidenti ukrainas Volodymyr Zelensky.
“Ai është një person i papërshtatshëm që është një kërcënim për të gjithë botën”, ka thënë Zelensky në një intervistë për Fox News që u transmetua të enjten. “Ai do të shkatërrojë NATO-n, ky është qëllimi i tij”.
Udhëheqësi ukrainas shtoi se lufta në Ukrainë do të marrë fund pasi “bota do të kuptojë” kërcënimin që paraqet Putin, shkruajnë mediat e huaja, përcjell Telegrafi.
Ndryshe, tensionet midis Rusisë dhe Perëndimit janë përshkallëzuar që kur shpërtheu lufta në Ukrainë në shkurt të vitit 2022, me NATO-n që qëndron fort pas mbrojtjes së Kievit ndaj pushtimit të Putinit.
Disa liderë perëndimorë kanë paralajmëruar se aleanca ushtarake duhet të përgatitet për një konflikt të drejtpërdrejtë me Rusinë në vitet e ardhshme, duke parashikuar se Kremlini do të shikojë drejt pushtimit të fqinjëve të tij baltik.
Dhe NATO, ka ndërmarrë hapa për të forcuar mbrojtjen e saj në muajt e fundit, duke përfshirë mobilizimin e afro 90,000 trupave për t’u trajnuar pranë kufirit ruso-suedi.
Megjithatë, Rusia ka paralajmëruar kundër lëvizjeve të tilla, me zëdhënësen e ministrisë së Jashtme ruse, Maria Zakharova, që e quajti operacionin për të trajnuar trupat “në natyrë provokuese”.
Dy vjet pas luftës, përpjekjet e Kievit për të larguar Rusinë nga territori i saj kanë ngecur kryesisht, me Moskën që ende pushton pothuajse një të pestën e vendit.
Zelensky është zotuar më parë se luftimet nuk mund të përfundojnë derisa e gjithë toka, përfshirë gadishullin e Krimesë, t’u kthehet ukrainasve, ndërsa Putin ka thënë se negociatat mund të arrihen vetëm pasi Moska të arrijë “denazifikimin” dhe “çmilitarizimin” e Ukrainës.