Presidenti rus Vladimir Putin konfirmoi dje lajmin e publikuar nga mediat ukrainase, duke cituar forcat e armatosura të vendit, se Rusia ka gjuajtur një raketë balistike ndërkontinentale në Dnieper në Ukrainë.
“Rusia lëshoi një raketë balistike eksperimentale hipersonike në Ukrainë gjatë natës në përgjigje të lejimit të Kievit të synonte Rusinë me raketa me rreze të gjatë veprimi të SHBA-së dhe Britanisë”, tha Putin, duke u zotuar se do t’i përgjigjet “përshkallëzimit” të mëtejshëm, sipas The Moscow Times.
Edhe pse lideri rus ka thënë më parë se lejimi i Kievit të përdorë armë me rreze të gjatë kundër objektivave ruse do ta vinte NATO-n në “luftë” me Moskën, deklarata shënoi paralajmërimin e tij më të drejtpërdrejtë deri më tani.
“Në përgjigje të përdorimit të armëve me rreze të gjatë amerikane dhe britanike, më 21 nëntor, forcat e armatosura ruse kryen një sulm të kombinuar në një objekt të industrisë së mbrojtjes të Ukrainës”, tha Putin.
“Ndër operacionet e kryera ishte testimi i një prej sistemeve më të fundit të raketave ruse me rreze të mesme veprimi”.
Në këtë rast është përdorur një raketë balistike e pajisur me një kokë hipersonike jo bërthamore”, tha kreu i Kremlinit.
Putin tha gjithashtu se Rusia do të paralajmërojë “civilët dhe qytetarët e vendeve mike të Ukrainës të pranishëm në ato zona që të evakuohen” nëse forcat e saj të armatosura vendosin raketa Oreshnik përsëri në të ardhmen.
“Ne do ta bëjmë haptazi dhe publikisht, për arsye humanitare, pa pasur frikë asnjë kundërshtim nga armiku, i cili do të marrë gjithashtu këtë informacion”, tha kreu i Kremlinit.
“Pse pa frikë? Sepse nga sot nuk ka mjete për të kundërshtuar një armë të tillë”, tha Putin, duke shtuar se Oresnik është në gjendje të godasë objektivat me një shpejtësi prej 2.5 deri në 3 kilometra në sekondë.
Një zyrtar amerikan i tha The Moscow Times në kushte anonimiteti se Rusia kishte lëshuar një “raketë eksperimentale balistike me rreze të mesme veprimi” në Ukrainë, një referencë e mundshme për Oreshkin.
Megjithatë, zyrtari vuri në dukje se Rusia ka të ngjarë të posedojë vetëm disa nga këto raketa dhe se Ukraina i ka rezistuar sulmeve nga raketat me koka luftarake dukshëm më të mëdha.