Këtë të diel, me datën 14 shtator, do të mbahet protesta në mbështetje të ish-krerëve të UÇK-së që po gjykohen në Dhomat e Specializuara. Në këtë ngjarje do të marrë pjesë edhe pronari i Televizionit Arbëria, Qëndrim Kryeziu, i cili, së bashku me një pjesë të stafit të televizionit, janë nisur drejt Hagës në mbrojtje të luftës së UÇK-së dhe për të sjellë tek publiku në kohë reale zhvillimet nga atje.
Kryeziu niset drejt Hagës: “Lufta e UÇK-së është e drejtë dhe e shenjtë, kërkojmë vetëm drejtësi!”
Kryeziu, pak para nisjes, ka deklaruar se si përkrahës dhe mirënjohës i luftës së UÇK-së, të dielën në protestë kërkohet vetëm drejtësi.
Së bashku me Kryeziun, drejt Hagës do t’i bashkohen edhe shumë shokë dhe mërgimtarë nga Milano.
“Ne kërkojmë vetëm drejtësi sepse u bënë 6 vite që mbahen në paraburgim, dhe presim vetëm drejtësi.
Kemi grupin tjetër në Milano që na u kanë mbledh shokët në Firencë, që janë duke na prit nesër diku nga ora 11 e ditës; do të takohemi së bashku me ta dhe do të nisemi drejt për në Amsterdam.”
“UÇK-ja është babë, është nanë – pa ta s’do ta kishim lirinë”, deklaron Qëndrim Kryeziu
Kryeziu, ndër të tjera, deklaron se lufta e UÇK-së për të është gjithçka, sepse pa të nuk do ta kishim lirinë.
“Për mu është gjithçka. UÇK-ja është babë, është nanë, është gjithçka. Po të mos ishin ata, ne s’do të ishim sot këtu.
Ai që e shan UÇK-në veç është psikopat, sepse po të mos ishin ata, nuk do të kishim as liri.
Ai që e shan UÇK-në, e shan motrën e vet, e shan nanën e vet – askënd tjetër. Vetëm e shan lirinë që e ka sjellë, edhe sot del e shëtit i lirë nëpër Prishtinë e kudo,” ka thënë Kryeziu.
Qëndrim Kryeziu: “Nuk po gjykohet individi, por Ushtria Çlirimtare, lufta që na e solli lirinë!”
Ai gjithashtu thekson se në Hagë nuk po gjykohet individi, por Ushtria Çlirimtare që e solli lirinë.
“Sot nuk po gjykohet atje individi, po na gjykohet ushtria. Po na gjykohet lufta, po na gjykohet lufta çlirimtare që na e ka sjellë këtë liri, e cila ishte në koordinim me Shtetet e Bashkuara dhe NATO-n. Ata nuk kanë dalë me vra qysh ka vra Serbia civilë.”
“Do të kërkojmë vetëm drejtësi, sepse lufta jonë është e drejtë dhe e shenjtë. S’ka asnjë që mundet me gjyku, shantazhu, thy apo dëmtu,” shton tutje Kryeziu.
Me 14 shtator protestë në Hagë, Qëndrim Kryeziu fton mërgatën: Ejani në Amsterdam, të mbrojmë dinjitetin tonë!
Krejt në fund, pronari i Televizionit Arbëria bën thirrje për pjesëmarrje në protestë në përkrahje të krerëve të UÇK-së.
“Ju ftoj mërgimtarë nga do që jeni, ju ftoj që të vini në Amsterdam dhe ta mbrojmë historinë, dinjitetin dhe të drejtën tonë”.