Autoritetet polake arrestuan të enjten pesë persona në lidhje me një operacion kontrabande që përdorte balona meteorologjike për të transportuar cigare nga Bjellorusia në Poloni. Sipas hetuesve, aktiviteti i paligjshëm ka shkaktuar humbje tatimore prej miliona dollarësh dhe ka ndërprerë trafikun ajror.
Të dyshuarit, mes tyre shtetas ukrainas, bjellorusë dhe polakë, akuzohen për përfshirje në krim të organizuar, shkelje të rregullave të trafikut ajror dhe mbështetje të agresionit kundër Ukrainës. Nëse shpallen fajtorë, ata rrezikojnë dënime nga nëntë muaj deri në 12 vjet burg. Të pestë janë vendosur në paraburgim për një periudhë tre mujore.
Hetuesit bëjnë të ditur se grupi ka kontrabanduar të paktën 48,000 pako cigaresh me vlerë rreth 1 milion zloty (237,000 euro) nga shtatori 2025 deri në shkurt të këtij viti. Si pasojë, thesari i shtetit polak ka humbur rreth 2 milionë zloty (474,000 euro) në taksa të papaguara të akcizës.
Operacioni përfshinte lidhjen e pakove të cigareve me balona meteorologjike të pajisura me pajisje GPS. Pasi balonat hynin në territorin polak, sinjali GPS u mundësonte kontrabandistëve të lokalizonin dhe të merrnin ngarkesën.
Shërbimet polake kanë raportuar vazhdimisht muajt e fundit për shkelje të hapësirës ajrore nga balona meteorologjike të nisura nga Bjellorusia, të cilat transportonin cigare dhe uleshin në territorin e Polonisë.