Policia holandeze ka arrestuar një burrë 29-vjeçar sirian, për të cilin dyshohej se ishte anëtar i Shtetit Islamik dhe po planifikonte një sulm në një vend të paspecifikuar në Evropë, kanë njoftuar prokurorët të martën.
Sipas autoriteteve, dyshimet mbi planet e tij u bazuan në postimet që burri kishte bërë në mediat sociale.
Prokurorët kanë thënë se agjencia holandeze e inteligjencës, AIVD, kishte gjetur mesazhe në të cilat burri kërcënonte të kryente një sulm gjatë periudhës së Krishtlindjeve.
Megjithatë, autoritetet nuk kanë dhënë detaje mbi sulmin e dyshuar ose mbi anëtarësinë e tij të mundshme në Shtetin Islamik.
Burri u arrestua më 18 dhjetor në shtëpinë e tij në Vlissingen, në jugperëndim të Holandës. Një gjykatë vendosi të martën që paraburgimi i tij të zgjatet për të paktën 30 ditë, ndërsa hetimet vazhdojnë.