Partia e jashtëligjshme e Punëtorëve të Kurdistanit (PKK) njoftoi një armëpushim me Turqinë, dy ditë pasi udhëheqësi i saj i burgosur Abdullah Ocalan i kërkoi grupit të çarmatoset dhe të shpërbëhet.
Armëpushimi, i cili hyn në fuqi menjëherë, përcakton se forcat e PKK do të përmbahen nga veprimet e armatosura nëse nuk sulmohen, raportoi faqja e lajmeve ANF, e njohur si afër PKK.
Megjithatë, grupi theksoi se Ocalani duhet të jetë në gjendje të “jetojë dhe të punojë në kushte të lira” që thirrja të zbatohet me sukses.
PKK-ja tha se është e gatshme të thërrasë një kongres siç kërkoi Ocalan, por këmbënguli se ai duhet të drejtojë personalisht takimin.
Sot nuk pati asnjë reagim të menjëhershëm nga autoritetet turke.
Të premten, presidenti turk Recep Tajip Erdogan tha se apeli i udhëheqësit të PKK-së për çarmatosjen dhe shpërbërjen e grupit shënon fillimin e një “faze të re”.
”Tani ekziston një mundësi për një hap historik”, tha Erdogan.
Herën e fundit që u shpall armëpushimi ishte në vitin 2013, por procesi i paqes dështoi në verën e vitit 2015.
PKK renditet si një organizatë terroriste në Turqi, BE dhe SHBA.
Që nga fillimi i viteve 1980, PKK ka luftuar për autonomi brenda Turqisë. Dhjetëra mijëra kanë vdekur në konflikt.
Sipas deklaratave të tyre, PKK tani është larguar nga kërkesa për një shtet të pavarur.
Ocalan, 75 vjeç, është i burgosur në një burg ishull pranë Stambollit që nga viti 1999.ATSH