Xhemajl Hasani ka njoftuar dorëheqjen e tij nga subjekti politik ku ka qenë i angazhuar deri më tani, por ka bërë të qartë se kjo nuk nënkupton tërheqje nga skena politike. Në një deklaratë publike, Hasani thekson se politika për të është më shumë se profesion – është pasion dhe përkushtim i thellë ndaj qytetarëve.
“Dorëheqja ime nga një subjekt politik nuk do të thotë dorëheqje nga politika. Politika për mua nuk është vetëm profesion, por është edhe pasion dhe përkushtim ndaj qytetarëve,” ka deklaruar ai.
Hasani shprehet se, edhe pse mund të ketë humbur një betejë, lufta e tij politike vazhdon me më shumë vendosmëri dhe liri veprimi.
“Unë mund të kem humbur një betejë, por nuk e kam humbur luftën. Angazhimi im politik nuk ndalet këtu – përkundrazi, vetëm sa po vazhdon në një formë më të lirë dhe më të vendosur.”
Në mesazhin e tij, ai përsëriti përkushtimin ndaj qytetarëve dhe vlerave të palëkundura që, sipas tij, do ta udhëheqin gjithmonë në rrugën politike.
“Gjithmonë kam qenë dhe do të jem zëri i qytetarëve. Asnjëherë nuk do të nënshtrohem para asnjë pushteti, sepse qëndrueshmëria, integriteti dhe besnikëria ndaj vlerave janë themeli i rrugës sime politike,” përfundoi Hasani.
Deklarata e tij ngjalli interes në opinionin publik dhe u pa si paralajmërim për një fazë të re të angazhimit të tij politik, ndoshta jashtë kornizave të deritanishme partiake.