Një person tjetër është gjetur i vdekur pas përmbytjeve në Greqinë qendrore këtë javë, që e çon numrin e të vdekurve nga fatkeqësia në 11, raportojnë mediat greke.
Viktima e fundit është një 77-vjeçar, trupi i të cilit u zbulua gjatë rrugës në ishullin Eubea. Ai ishte zhdukur nga përmbytjet në një plazh afër Volos.
Gjashtë persona janë të zhdukur për momentin, sipas Ministrisë së Mbrojtjes Civile dhe Krizave Klimatike.
Që nga e premtja autostrada Selanik-Athinë është mbyllur sërish në zonën e qytetit të Larisës, ku ka dalë lumi Peneus. Evakuime të reja raportohen në qytet, megjithëse autoritetet raportuan një rënie prej 40 cm të nivelit të ujit të premten.
Ujërat e liqenit të Karlës pranë Volosit gjithashtu kanë ardhur në rritje të rrezikshme që nga mbrëmja e djeshme, ku si pasojë janë përmbytur edhe zona të mëdha të Thesalisë juglindore. Dy fshatra të zonës janë vënë në alarm për evakuim të mundshëm. Shtabi i Përgjithshëm grek tha se helikopterët e vendosur në bazën aty pranë Stefanovikeio ishin të sigurt.
Një numër fshatrash në Thesali janë evakuuar, por shumë njerëz mbeten ende të bllokuar në vendbanimet e përmbytura. Midis 7 dhe 9 shtatorit, 767 njerëz janë shpëtuar nga ajri, ndërsa ushqimi, uji, ilaçet dhe batanijet po transportohen me avion në shumë vende. Në total, 3,443 persona janë larguar nga zonat e përmbytura nga ekipet e shpëtimit./BTA/
/TV Arbëria
