Një ndërtim në zonën e Shirokës, ka nxjerrë në skenë në rolin e sekserit dhe shantazhuesit këngëtarin e njohur, dhe fituesin e Big Brother Luiz Ejlli. Ky i fundit, ka tentuar që përmes kërcënimeve, të ndërhyrjë te drejtori i IKMT-së Agim Ismaili, që biznesi që po ngrihej në zonën e Shirokës, pa leje, të mos shëmbej. Por Ismaili ka këmbëngulur që t’i qëndrojë vendimit të tij për shembjen e objektit, vendim i cili është zbatuar pavarësisht largimit të tij nga detyra në muajin Nëntor të vitit të kaluar.
Por historia nuk mbaron me prishjen e objektit në muajin tetor
Me emërimin e drejtorit të ri të IKMT-së, Ervin Hoxha, personat që kishin denoncuar objektin pa leje, pjesë e strukturës së IKMT’së në Shkodër, e kanë gjetur veten të shkarkuar nga puna, ndërsa iu është dërguar dhe një mesazh, ku iu bëhej të fala nga Luiz Ejlli. Shkarkimi i tyre mban datën 19 dhjetor 2023, ndërkohë që punonjësit që e kanë gjetur veten në rrugë, kanë çuar në SPAK Ervin Hoxhën duke zbuluar dhe të gjitha prapaskenat e lirimit të tyre nga detyra.
Pjesë nga kallëzimi në SPAK
Sapo është marrë vendimi për prishjen e objektit, Luiz Ejlli ka marrë me urgjencë kreun e IMT Shkodër, Agim Ismaili dhe i ka kërkuar atij një takim. Takimi është zhvilluar në datë 17.10.2023. Në kallëzim thuhet se Luiz Ejlli ka kërkuar që të mos ndërhyhet për prishjen e këtij objekti, të paktën për disa javë derisa ta legalizonin. Ismaili i ka kërkuar edhe Drejtorit që ka bërë kallëzimin që të marrë pjesë në këtë takim.
Në kallëzim, thuhet se në momentin që këngëtarit iu komunikua se nuk ka asnjë hapësirë ligjore që të mos prishet ky objekt, ai ka kryer një telefonatë në prani të zyrtarëve të IMT. Personi me të cilin ka komunikuar nuk dihet, por biseda është zhvilluar me zë të lartë përmes telefonit, dhe sipas kallëzimit personi në fjalë ka lëshuar kërcënime kundrejt zyrtarëve duke u shprehur se “nuk i ka mbetur gjë tjetër veçse ta zgjidhë me armë”.
Tentativat e Luiz Ejllit për të ndërhyrë te kreu i IMT shkuan dëm dhe më pas në datë 20.10.2023 është prishur objekti. Telefonata e Luiz Ejllit kishte shtuar dyshimet e zyrtarëve të IMT-së se pas ndërtimit të këtij objekti nuk fshihej 79-vjeçari, por persona të tjerë. Kështu, zyrtarët u vendosën në lëvizje për të gjetur ‘kokën’ dhe kanë kryer disa inspektime te fabrikat e betonit me qëllim për të rënë në gjurmët e personit që ka kryer blerjet për këtë godinë.
“Pas këtij operacioni të IKMT dhe veprimeve të tjera verifikuese administrative, kam vijuar detyrat normalisht megjithëse shpeshherë kam dëgjuar se ai ndërtim që prishëm: Është ndërtuar nga anëtar të grupit kriminal të “Bajrave” në Shkodër. Luiz Ejllit i është premtuar një pjesë e atij ndërtimi nëse do arrinte të shpëtonte prishjen e tij.Për prishjen e tij do hakmerreshin ndaj meje e të tjerëve.
Mirëpo këto të dhëna nuk i kam vlerësuar e as marrë në konsideratë për shkak se të gjitha veprimet e kryera prej meje kanë qenë në përputhje me parashikimet ligjore dhe i përgjigjeshin më së miri paligjshmërisë së konstatuar”, thuhet në kallëzimin e depozituat në SPAK. /ZËRI