Një civil u vra dhe dy të tjerë u plagosën në granatimet ukrainase të qytetit Shebekino në rajonin Belgorod të Rusisë, tha të enjten guvernatori Vyacheslav Gladkov, raporton The Guardian.
Ndërkaq, mbrojtja ajrore ukrainase rrëzoi rreth 15 dronë të nisur nga Rusia në sulmin e tretë në kryeqytetin ukrainas në katër ditë, tha të enjten Serhiy Popko, kreu i administratës ushtarake të Kievit.
Mbetjet e dronit dëmtuan dritaret dhe dyert e një ndërtese apartamentesh dhe shkaktuan një zjarr në një ndërtesë jo-banesore, i cili u shua, tha Popko në një deklaratë pas sulmeve të fundit ajrore ruse në Ukrainë, të cilat ishin kryesisht gjatë natës.
Guvernatori rajonal i Kievit, Ruslan Kravchenko, tha se dronët nuk shkaktuan dëmtime në infrastrukturën kritike në rajonin e Kievit dhe autoritetet e qytetit dhe ato rajonale nuk raportuan për viktima.
Rënia e mbeturinave shkaktoi gjithashtu një zjarr në bazën e një ndërmarrje private në rajonin qendror të Cherkasy dhe shërbimet e urgjencës po merreshin me zjarrin, tha guvernatori rajonal.
Ndërkohë ministrat e jashtëm të BE-së po mblidhen në Bruksel për një takim jozyrtar. Ukraina dhe Lindja e Mesme dominojnë agjendën.
Ministri i Jashtëm i Ukrainës, Dmytro Kuleba, pritet të marrë pjesë personalisht për të bërë presion që vendi i tij të lejohet të përdorë armët e furnizuara nga perëndimi në territorin rus.