Ka nisur gjykimi për krime lufte ndaj Millosh Pleckoviq, i cili akuzohet se në Prizren gjatë viteve 98-99, në bashkëkryerje me disa ushtarë serbë vranë tre civilë shqiptarë dhe plagosën disa të tjerë. Këto akuza, i mohoi sërish Pleckoviq. E të dëmtuarit, paralajmëruan kërkesë për kompensim dëmi.
Në Gjykatën Themelore në Prishtinë, ka nisur gjyqi për krime lufte ndaj Millosh Pleckoviqit.
Ai akuzohet se në vitin 1998-1999, në bashkëkryerje me disa ushtarë të tjerë serbë, kanë vrarë tre civilë shqiptarë dhe plagosen disa të tjerë.
“Në ato momente i pandehuri kishte shtënë me armë, të tipit kallashnikov në drejtim të tyre. Dhe me të filluar të shtënat, viktima tanimë i ndjeri Binak Dacaj, e ka shtyrë me krahë të dëmtuarin Xhenger Cana, duke e futur nën rrugë në mënyrë që të shpëtojë nga vrasja, pasi ishte më i riu në moshë”, tha prokurori Ilir Morina.
Gjatë leximit të aktakuzës, prokurori potencoi edhe gjymtimin e të vrarëve.
“Familjarët kanë shkuar për të marrë trupat e të ndjerëve, Reshat, Binak dhe Fatmir, me ç’rast kanë parë se trupat e viktimave janë të gjymtuar, ashtu që Reshati dhe Binaku ishin vendosur njëri mbi tjetrin, e njëri nga ta e kishte këmbën e prerë nga trupi, kurse viktima Fatmiri nuk e kishte pasur kokën në trup. Me këtë i nderuar gjykatës, ekziston dyshimi i bazuar mirë se në bashkëkryerje ka kryer veprën penale krime lufte”, tha ai.
Megjithëkëtë, Pleckoviq mohoi sërish fajësinë.
“Nuk ndjehem fajtor për akuzat“, tha i akuzuari Millosh Pleckoviq.
Në sallë ishin edhe të dëmtuarit e këtij rasti, Lirije Daqaj, Byrhamedin Bojaxhiu, Xhenger Cana, Fevzi Cana dhe Bashkim Kastrati, që pritet të dëshmojnë në seancat e radhës që do të mbahen në janar.
Në kuadër të kësaj, mbrojtja e të dëmtuarve theksoi edhe postimet e të akuzuarit në rrjete sociale që e mbështesin akuzën.
“Do të kërkojmë të nxjerret prova e facebook, ku në profilin e tij, ku shihet në foto album, i njëjti ka postime radikale ekstreme serbe dhe shihet se aty është me disa bashkëluftëtar, me çka konsiderojmë se edhe kjo do ta forcojë tezën e prokurorit të shtetit edhe më shumë”, tha mbrojtësi i viktimave, Gent Gjini.
E sipas mbrojtjes së Pleckoviqit, akuza për krime lufte nuk është e argumentuar.
“Millosh Pleckoviqi në vitin 98 i ka pasur vetëm 19 vjet. Asnjëherë nuk ka qenë në shërbimin ushtarak të rregullt. Për këtë në aktakuzë poashtu nuk ekziston asnjë prove”, tha Jovana Filipoviq, avokate e Pleckoviq.
Të dëmtuarit në këtë rast, paralajmëruan që do të ushtrojnë të drejtën e tyre për të kërkuar kompensim dëmi.