Ne, komuniteti shqiptar në Amerikë, jemi duke ndjekur me shqetësim ngjarjet e fundit që lidhen me sulmin terrorist të 24 shtatorit nga grupi i armatosur serb dhe i mbështetur nga strukturat shtetërore të Serbisë kundër Policisë së Kosovës, meqë rast mbeti i vrarë një polic dhe u plagosën disa të tjerë.
Në bazë të dëshmive që janë publikuar nga Ministria e Brendshme e Kosovës dhe mediat ndërkombëtare që lidhen me këtë ngjarje, duket qartë se shteti serb në krye me Presidentin Vuqiq është i involvuar në këtë sulm, i cili i ka dhënë mbështetje logjistike dhe e ka pajisur me armatim këtë grupi terrorist që ka pasur për qëllim aneksim e Veriut të Kosovës.
Si shqiptarë që jetojmë dhe veprojmë në shtetin amerikan, jemi të gatshëm të ndihmojmë Policinë dhe FSK- në në cilën do formë që kërkohet për të përballuar edhe njëherë agresionin permanent serb, madje së fundi edhe sulmet terroriste kundër shtetit tonë, Republikës së Kosovës.
I bëjmë thirrje presidentit serb, Aleksander Vuqiq të frenoj ambiciet e tij për invazion ndaj shtetit tonë, i cili si duket ka vendosur që përmes sulmeve terroriste ndaj forcave policore të Kosovës të arrijë qëllimet e tij megalomane.
Ne do t’i përgjigjemi proporcionalisht çdo sulmi eventual terrorist që mund të ndodh në territorin e Republikës tonë kundër forcave policore dhe ushtarake të shtetit tonë.
Prandaj kërkojmë që vuajtjet shekullore të shqiptarëve nga represioni dhe agresioni i shtetit serb të marrin fund përgjithmonë përmes dialogut, bazë e secilës të jetë pranimi i Pavarësisë së Kosovës e shpallur me 17 shkurt, 2008, pasi ky do të ishte çelës për qetësimin njëherë e mirë të rajonit të Ballkanit.
/TV Arbëria
