Kryeministri izraelit Benjamin Netanyahu i është drejtuar Asamblesë së Përgjithshme të Kombeve të Bashkuara në Nju Jork. Ai tha se njohja e një shteti palestinez është “çmenduri e pastër, është çmenduri dhe ne nuk do ta bëjmë”, duke shtuar se njohja nga disa vende të tjera është “e turpshme”.
Ndërsa Netanyahu u ngjit në skenë, dhjetëra njerëz dolën nga salla në Nju Jork në shenjë proteste, ndërsa disa duartrokitën. Netanyahu tha se altoparlantët në Izrael po e transmetojnë fjalimin në Gazë, raporton BBC.
Duke iu drejtuar drejtpërdrejt pengjeve që mbahen nga Hamasi, ai tha: “Ne nuk ju kemi harruar – as për një sekondë. Populli i Izraelit është me ju”.
Fjalimi i tij vjen ndërsa Donald Trump thotë se nuk do ta lejojë Izraelin të aneksojë Bregun Perëndimor të pushtuar nga Izraeli.
Izraeli po përballet me presion global në rritje për t’i dhënë fund konfliktit dhe pushtimit të Bregut Perëndimor.
Duke folur në OKB të enjten, presidenti palestinez, Mahmoud Abbas përsëriti refuzimin e tij për një rol qeverisës të ardhshëm për Hamasin në Gazë dhe kërkoi që ai të çarmatoset.