Ndërmjetësuesit ndërkombëtarë kanë nisur një raund të ri bisedimesh që synojnë ndalimin e luftës në Gaza dhe sigurimin e lirimit të shumë pengjeve, raporton Reuters duke cituar një zyrtar që kishte njohuri mbi negociatat, transmeton Gazeta Express.
Një marrëveshje shihet si shpresa më e mirë për të shuar një konflikt edhe më të madh rajonal. Shtetet e Bashkuara, Katari dhe Egjipti do të takoheshin me një delegacion izraelit në Katar. Hamasi nuk pritet të marrë pjesë drejtpërdrejt, por ka rënë dakord në parim me një propozim të paraqitur nga SHBA, i cili ka mbështetje ndërkombëtare.
Ndërkohë, Shtëpia e Bardhë u ka kërkuar të gjitha palëve që të marrin pjesë në bisedimet e armëpushimit të Gazës në Doha, në mënyrë që të zbatohet një marrëveshje, duke i kërkuar Izraelit dhe Hamasit të bëjnë kompromis dhe duke thënë se progresi është ende i mundur në ditët në vijim.
Zyrtarët e Hamasit, të cilët kanë akuzuar Izraelin për ngecje, nuk i janë bashkuar bisedimeve të sotme. Megjithatë ndërmjetësit planifikonin të konsultoheshin me ekipin negociator të Hamasit me bazë në Doha pas takimit, thanë zyrtarët për Reuters.
Zëdhënësi i Sigurisë Kombëtare të Shtëpisë së Bardhë, John Kirby, në një intervistë për CNN, tha gjithashtu se informacionet tregojnë se Irani nuk ka hequr dorë nga kërcënimi i tij për të sulmuar Izraelin, duke përfshirë potencialisht përmes përfaqësuesve. Shtetet e Bashkuara po e vëzhgojnë situatën nga afër dhe janë të përgatitura, megjithëse “shpresojmë që të mos arrihet deri tek kjo”, tha ai.