Ndryshimet klimatike po dëmtojnë shëndetin e zemrës së njerëzve në mbarë botën, paralajmëron një rishikim i ri.
Temperaturat ekstreme, uraganet dhe ngjarje të tjera të rrezikshme të motit kontribuojnë në një rrezik të shtuar të sëmundjeve të zemrës dhe vdekjeve të lidhura me zemrën, raportuan studiuesit të mërkurën në revistën JAMA Cardiology.
“Ndryshimi i klimës tashmë po ndikon negativisht në shëndetin kardiovaskular në ShBA dhe në mbarë botën”, tha studiuesi Dhruv Kazi, drejtor i asociuar i Qendrës Mjekësore Beth Israel Deaconess për Kërkimin e Rezultateve në Boston. “Nevojitet veprim urgjent për të zbutur rrezikun kardiovaskular të lidhur me ndryshimet klimatike, veçanërisht në mesin e popullatave tona më të cenueshme”.
Gjatë shekullit të kaluar, temperatura mesatare globale është rritur me më shumë se 2 gradë Fahrenheit, thanë studiuesit. Kjo ka çuar në ndryshime afatgjata të modeleve të motit, rritje të nivelit të detit dhe ndërprerje të ekosistemeve.
10 vitet më të nxehta të regjistruara kanë ndodhur të gjitha në dekadën e fundit, vunë në dukje studiuesit.
Për këtë rishikim, studiuesit vlerësuan të dhënat nga gati 500 studime të mëparshme të kryera midis viteve 1970 dhe 2023.
Të gjitha studimet shikuan lidhjet midis shëndetit të zemrës dhe fenomeneve të motit, duke përfshirë temperaturat ekstreme, tymin e zjarreve, ndotjen e ozonit, depërtimin e ujit të kripur dhe ngjarje si uraganet, stuhitë e pluhurit dhe thatësirat.
Ata zbuluan se shëndeti i zemrës së të moshuarve, grupeve minoritare dhe të varfërve ndikohet në mënyrë disproporcionale nga ndryshimet klimatike.