Eksperti i çështjeve të sigurisë, Agim Musliu, së fundmi, deklaroi se edhe hulumtim i “Reporting Diversity Network 2.0”, ka ardhur në përfundim se mohimi i Masakrës së Reçakut ka nisur nga shërbimet serbe të inteligjencës dhe vazhdon të trumpetohet ende si i tillë.
“Hulumtimi, linkun e të cilit po e jap më poshtë, flet pikërisht për statusin që ne si #Octopus e bëmë më 15 janar. Hulumtimi është realizuar nga “Reporting Diversity Network 2.0” që u krijua dhe mirëmbahet me mbështetjen financiare të Bashkimit Evropian, Balkan Trust for Democracy, një projekt i fondit gjerman Marshall të Shteteve të Bashkuara dhe Ministrisë së Punëve të Jashtme Norvegjeze në Beograd. https://www.reportingdiversity.org/troll-of-the-month…/ “, shkroi ai në Facebook.
Musliu, më 15 janar të këtij viti, ka potencuar se mediat serbe po mundohen ta mohojnë Masakrën e Reçakut.
“Mohimi i Masakrës së Reçakut ka nisur nga shërbimet serbe të inteligjencës, dhe vazhdon të trumpetohet ende si i tillë. Edhe ky serbi, kryeredaktori i kësaj medie serbe, që emrin e ka “KOSOVOONLINE”, por që është krejt kundër Kosovës, sot paska mohuar këtë masakër. Milos Garic është bashkëpunëtor i BIA-s. Ok, se jeton në Beograd dhe ndez fitil në Kosovë. Por nuk mund ta kuptoj si lejohet një medie e tillë nga prokuroria e Kosovës, nga drejtësia e Kosovës të krijojë kësi të gënjeshtrash që kanë impakt nacional dhe internacional.”, ka shkruar Musliu.
Ndryshe, më 15 janar Kosova ka përkujtuar 24-vjetorin e Masakrës së Reçakut, në të cilën janë vrarë mbi 45 civilë të pafajshëm shqiptarë. Ish-shefi i misionit vëzhgues të OSBE-së në Kosovë, ambasadori William Walker e kishte cilësuar Masakrën e Reçakut si krim kundër njerëzimit. Më 15 janar 1999, në fshatin Reçak janë vrarë e masakruar barbarisht 45 shqiptarë të paarmatosur.
/TV Arbëria
